वीरगंज । जेन जि आन्दोलनका क्रममा नख्खु कारागार ललितपुरबाट फरार भएका लागुऔषध मुद्दाका कैदी वीरगंजबाट पक्राउ परेका छन् ।
जिल्ला प्रहरी कार्यालय पर्साका अनुसार विशेष सूचनाको आधारमा वडा प्रहरी कार्यालय श्रीपुरबाट खटिएको प्रहरी टोलीले वीरगंज महानगरपालिका–१० रानीघाटका ३९ वर्षीय लालबाबु साहलाई पक्राउ गरेको हो ।
साहलाई ललितपुर जिल्ला अदालतले लागुऔषध सम्बन्धी कसूरमा २ वर्ष १ महिना कैद सजाय र १ लाख ५ हजार रुपैया जरिवानाको सजाय तोकेको थियो । उनी मिति २०८२ साउन २४ गते नख्खु कारागारबाट जेन जि आन्दोलनका क्रममा फरार भएका थिए ।
प्रहरीका अनुसार साह आफ्नै घरमा लुकीछिपी बसिरहेको सूचनाको आधारमा मंगलबार साँझ ५ः३० बजे पक्राउ गरिएको हो। उनलाई आवश्यक कारबाहीका लागि सम्बन्धित कारागार कार्यालयमा पठाउने तयारी भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए ।
