वीरगंज । पत्रकार मनोज पटेलको शब्द र स्वरमा तयार गरिएको “हलि हलि उग हे सुरज देव” भोजपुरी छठीमाईकाे गीत शनिबार साँझ सार्वजनिक गरिएको छ । यो गीत नेपाल पोस्ट मिडिया प्रा.लि.को युट्युब च्यानल “नेपाल पोस्ट डेली” मार्फत सार्वजनिक गरिएको हो ।
गीतका शब्दरचनाकार र गायक दुवै पत्रकार मनोज पटेल हुन् । पत्रकारितासँगै सांगीतिक यात्रालाई पनि निरन्तरता दिँदै उनले यसपालि धार्मिक र सांस्कृतिक भावना मिसिएको छठकाे गीत सार्वजनिक गरेका हुन्।
गीतका निर्देशक तथा नेपाल पोस्ट मिडिया प्रा.लि.का प्रबन्ध निर्देशक सन्तोष साहका अनुसार, “गीतमा पारम्परिक भक्ति, आधुनिक संगीत र सन्देशात्मक अभिव्यक्ति संयोजन गरिएको छ । भिडियो पनि निकै सुमधुर र आकर्षक बनेको छ ।” उनले थपे, “गीत सार्वजनिक भएको केही घण्टामै दर्शक–श्रोताबाट उल्लेखनीय प्रतिक्रिया पाइरहेको छ ।”
गीतको म्युजिक भिडियो वीरगंजकाे घडिअर्वा पोखरी र कलैयास्थित सिदेश्वर माध्यमिक विद्यालयको पोखरी (छठी घाट) लगायतका धार्मिक र रमणीय स्थलमा छायांकन गरिएको हो । भिडियोमा छठ पर्वको श्रद्धा, महिलाहरूको व्रत, र सूर्य उपासनाको भक्ति भाव प्रस्तुत गरिएको छ ।
गीतको मुख्य सन्देश सूर्य देवप्रति आस्था प्रकट गर्दै “छठी व्रती महिलाहरूको तर्फबाट सूर्य उदाउने क्षण चाँडो आओस्” भन्ने भावनात्मक आग्रहका रूपमा प्रस्तुत गरिएको छ ।
म्युजिक भिडियोमा पत्रकार बिनोद पटेल, बबिता पटेल, सन्ध्या साह, अमिता पटेल र स्वयं गायक मनोज पटेलले अभिनय गरेका छन् । स्थानीय कलाकारहरूको सहभागिताले भिडियोलाई थप जीवन्त र समुदायमुखी बनाएको छ । भिडियो नेपाल पोस्ट मिडिया प्रा.लि.का अन्य सामाजिक सञ्जाल प्लेटफर्महरूमा पनि उपलब्ध छ ।
गीत सार्वजनिक भएपछि नेपाल पत्रकार महासंघ पर्साका उपाध्यक्ष भुषण यादवले प्रतिक्रिया दिँदै भने, “पत्रकारहरूले सांस्कृतिक गीतमार्फत समाजमा सन्देश फैलाउने प्रयास प्रशंसनीय छ। ‘छठीमाई’ गीत सुन्दा श्रद्धा र सौन्दर्य दुवै महसुस हुन्छ।”
गीतले धार्मिक भावनासँगै स्थानीय संस्कृति र भाषाको पहिचान प्रवर्द्धन गरेको भन्दै धेरैले सराहना व्यक्त गरेका छन्।
