वीरगंज । हिन्दूहरूको महान पर्व छठको अवसरमा ग्रिनसिटी सामुदायिक प्रहरी सेवा केन्द्र आदर्शनगर र रुँगटा वेलफेयर सोसाइटी वीरगंज–पर्साको संयुक्त आयोजनामा वीरगंज कारागारमा रहेका महिला कैदीहरूलाई साडी वितरण कार्यक्रम सम्पन्न भएकाे छ।
वीरगंज महानगरपालिका–४ स्थित वीरगंज कारागारमा आयोजित कार्यक्रममा ७५ जना महिला थुनुवा तथा कैदीहरूलाई नि:शुल्क नयाँ साडी वितरण गरिएको हो।
ग्रिनसिटी सामुदायिक प्रहरी सेवा केन्द्र आदर्शनगरका अध्यक्ष जय प्रकाश खेतानकाे अध्यक्षतामा भएकाे कार्यक्रममा रुँगटा वेलफेयर सोसाइटी वीरगंज–पर्साका अध्यक्ष मुर्लीधर रुँगटा, पर्साका प्रमुख जिल्ला अधिकारी तोय नारायण सुबेदी, नेपाल इनोभेटिभ सोसाइटी पर्साका अध्यक्ष कमल चौगाई, प्रहरी अधिकारी, समाजसेवी, बुद्धिजीवी, विशिष्ट व्यक्ति तथा सञ्चारकर्मीहरूको उपस्थिति रहेको थियो।
कार्यक्रमका अध्यक्ष खेतानले भने, “छठ पर्व केवल धार्मिक आस्थाको विषय होइन, यो मानवीय सहयोग र सहानुभूतिको पनि पर्व हो। कारागारभित्र रहेका दिदीबहिनीहरूसँग यो पर्वको खुशी बाँड्न पाउनु हाम्रो लागि गर्वको कुरा हो।”
त्यस्तै प्रमुख अतिथि मुर्लीधर रुँगताले सामाजिक उत्तरदायित्वका कार्यक्रमहरूमा निरन्तर साथ र सहयोग गर्ने प्रतिबद्धता व्यक्त गर्दै भने, “रुँगटा वेलफेयर सोसाइटीले सदैव समाजका विपन्न, असहाय र सहयोग आवश्यक व्यक्तिहरूका लागि मानवसेवामूलक कार्य गर्दै आएको छ, र आगामी दिनमा पनि यसलाई निरन्तरता दिनेछ।”
