वीरगंज । बारा र पर्सा जिल्लामा सञ्चालित हैजाविरुद्धको खोप अभियानमा स्थानीयवासीको उत्साहजनक सहभागिता देखिएको छ । हालसम्म दुबै जिल्लामा कुल लक्षित जनसङ्ख्याको ७१ प्रतिशतले खोप लगाइसकेका छन् ।
स्वास्थ्य सेवा विभागअन्तर्गत बाल स्वास्थ्य तथा खोप शाखा प्रमुख डा. अभियान गौतमका अनुसार दुबै जिल्लामा १० लाख १८ हजार ६० जनामध्ये सात लाख २३ हजार ८३६ जनाले खोप प्राप्त गरिसकेका छन् ।
पर्सामा छैँठौँ दिनसम्ममा छ लाख ५२ हजार १२९ मध्ये चार लाख ५६ हजार ७७८ जनाले र बारामा तीन लाख ६५ हजार ९३१ मध्ये दुई लाख ६७ हजार ५८ जनाले खोप लगाइसकेका छन् ।
हैजा फैलिएको जोखिमलाई मध्यनजर गर्दै पर्साका सबै स्थानीय तह र बाराका कलैया, जितपुर–सिमरा, परवानीपुर, प्रसौनी, फेटा र विश्रामपुर गाउँपालिकामा एक वर्ष माथिका सबै उमेरका व्यक्तिलाई खोप दिइँदै आएको छ ।
डा. गौतमले भने, “हाल अभियानलाई भोलिसम्म निरन्तरता दिइनेछ । बाँकी जनसंख्या अनुसार तिहारपछि अर्को चरणमा पुनः खोप अभियान सञ्चालन गर्ने तयारी भइरहेको छ ।”
नेपाल सरकारले पर्सा र बारामा देखिएको हैजाको जोखिम न्यूनीकरणका लागि खोप अभियान सञ्चालन गरेको हो । सरकारी तथा गैरसरकारी निकायहरूका साथै मन्दिर, मस्जिद, बसपार्क, उद्योग, इँट्टाभट्टा र सिमानाका नाकाहरूमा खोप सेवा सञ्चालन भइरहेको छ ।
