वीरगंज । सशस्त्र प्रहरी बल नेपाल नं. १३ गण, पर्सा मातहतका सशस्त्र प्रहरीकाे टोलीले अवैध लागुऔषध गाँजा सहित एक भारतीय नागरिकलाई पक्राउ गरेको छ।
बुधबार राति करिब १० बजेर २० मिनेटको समयमा वीरगंज महानगरपालिका–१६ स्थित भन्सार कार्यालय पछाडिको मन्दिर क्षेत्रबाट चेकजाँचका क्रममा भारत, बिहार राज्यको पटना बस्ने ७० वर्षीय ब्रम्ह सहनी पक्राउ परेका हुन् ।
सशस्त्र प्रहरी वरिष्ठ हवल्दार तेजेन्द्र बस्नेतको कमाण्डमा खटिएको पाँच जनाको टोलीले वीरगंजबाट रक्सौलतर्फ पैदल जाँदै गरेका सहनीलाई शंका लागेपछि चेकजाँच गरेको थियो । चेकजाँचका क्रममा उनको झोलाभित्र प्लास्टिक र टेपले बेरिएको अवस्थामा लुकाइ–छिपाई ल्याइएको करिब ६ किलो गाँजा फेला परेको सशस्त्र प्रहरीले जनाएको छ ।
पक्राउ परेका व्यक्तिलाई बरामद गाँजासहित आवश्यक कारबाहीका लागि वडा प्रहरी कार्यालय बिर्ता, पर्सामा बुझाउने प्रक्रिया जारी रहेको सशस्त्र प्रहरी बल नेपाल नं. १३ गण, पर्साका सूचना अधिकारी प्रहरी नायब उपरिक्षक सुरज कार्कीले जानकारी दिए ।
