वीरगंज । संगीत क्षेत्रमा भविष्य खोज्दै गरेका प्रतिभाशाली युवा–युवतीलाई प्रोत्साहन गर्ने उद्देश्यले आयोजित ‘वीरगञ्ज स्कुल आइडल सिजन–२’ का सहभागीहरूलाई विशेष सम्मान गरिएको छ।
वीरगञ्ज महानगरपालिका–२० का वडाअध्यक्ष रामकिशोर सिंह परागको पहलमा सम्पन्न कार्यक्रममा प्रतियोगितामा उत्कृष्ट प्रदर्शन गर्ने प्रतिभाहरूलाई सम्मानसहित प्रोत्साहन प्रदान गरिएको हो।
कार्यक्रममा बोल्दै वडाअध्यक्ष परागले कला र संगीतले समाजमा सकारात्मक ऊर्जा भर्न सक्ने उल्लेख गर्दै भने, “कला र संगीतले युवालाई कुलत र दुर्व्यसनबाट टाढा राख्न सक्छ, त्यसैले यस क्षेत्रलाई प्राथमिकतामा राख्नुपर्छ।” उहाँले स्थानीय तहहरूले कलात्मक गतिविधिमा पर्याप्त लगानी नगरेको गुनासो पनि व्यक्त गर्नुभयो।
कार्यक्रमका संयोजक सद्धाम हुसैनले ‘वीरगञ्ज स्कुल आइडल’ मार्फत स्थानीय स्तरमा लुकेका प्रतिभालाई पहिचान र अवसर प्रदान गर्ने लक्ष्य राखिएको बताए। उहाँका अनुसार निकट भविष्यमा ‘वीरगञ्ज आइडल’ आयोजना गर्ने तयारी पनि भइरहेको छ।
नेपाल पत्रकार महासंघ पर्साका सचिव विजय चौहानले वीरगञ्जलाई केवल आर्थिक र व्यापारिक केन्द्रको रूपमा मात्र होइन, “कला र प्रतिभाको शहर”का रूपमा परिचित गराउन यस्ता कार्यक्रमले महत्वपूर्ण भूमिका खेल्ने धारणा राखे।
त्यस्तै, कलाकार अशोक प्रधानले यस्ता प्रतियोगिताले संगीतप्रेमी युवालाई आत्मविश्वास र मंच प्रदान गर्ने बताए।
प्रतियोगिताका विजेता कोशीश लामाले ‘वीरगञ्ज स्कुल आइडल’ ले आफ्नो आत्मविश्वास बढाएको र गायनमै भविष्य निर्माण गर्ने प्रेरणा दिएको अनुभव बाँडे। तेस्रो स्थान हासिल गरेकी प्रियान्शी आर्यले पनि गायनलाई निरन्तरता दिने प्रतिबद्धता जनाइन्।
कार्यक्रमको सहजीकरण सञ्चारकर्मी सूर्य शुभचिन्तकले गर्नुभएको थियो।
