वीरगंज । हालैको आन्दोलनका क्रममा लुटपाट, तोडफोड र आगजनीबाट पूर्ण रूपमा क्षतिग्रस्त भएको वीरगंज महानगरपालिकाको कार्यालय पुनःसञ्चालन सहज बनाउन विभिन्न संघ–संस्थाबाट सहयोग आउने क्रम जारी छ ।
यसै क्रममा नेपाल औषधी उत्पादक संघ, वीरगंज इकाईले बुधबार वीरगंज महानगरपालिकालाई १० थान कम्प्युटर सेट (युपिएससहित) र ४ थान प्रिन्टर हस्तान्तरण गरेको छ । संघले उक्त सहयोग आफ्नो सामाजिक उत्तरदायित्व (CSR) अन्तर्गत गरेको बताएको छ ।
गत भदौ २४ गते भएको आन्दोलनका क्रममा महानगर भवनसहित फर्निचर, कागजात र सूचना–प्रविधिसम्बन्धी उपकरण जलेर नष्ट भएका थिए । सो घटनापछि महानगरको दैनिक प्रशासनिक कामकाज गम्भीर रूपमा प्रभावित भएको थियो ।
सामग्री हस्तान्तरण कार्यक्रमका प्रमुख अतिथि वीरगंज महानगरपालिकाका प्रमुख राजेशमान सिंहले औषधी उत्पादक संघले असहज परिस्थितिमा पुर्याएको सहयोग पुनःसञ्चालनका लागि अत्यन्त उपयोगी भएको बताउनुभयो । उहाँले भन्नुभयो, “महानगरको दैनिक काम सहज बनाउन यो सहयोग महत्वपूर्ण छ । संघप्रति हार्दिक धन्यवाद व्यक्त गर्दै भविष्यमा पनि सहकार्य निरन्तर रहोस् भन्ने अपेक्षा राख्दछु ।”
संघका वरिष्ठ उपाध्यक्ष प्रभात रुंगटाले कठिन समयमा नगरको पुनःनिर्माणमा साथ दिन पाउनु गौरवको विषय भएको बताए । उहाँले भने, “नगरपालिकाको सम्पत्ति जल्नु भनेको नागरिककै सम्पत्ति नष्ट हुनु हो । यस्तो अवस्थामा सबै क्षेत्रका निकायले हातेमालो गर्न जरुरी छ । हाम्रो सानो सहयोगले महानगरलाई फेरि उठ्न प्रेरणा मिलोस् भन्ने उद्देश्यले यो कदम चालिएको हो ।”
कार्यक्रममा महानगरका प्रमुख प्रशासकीय अधिकृत अरविन्द लाल कर्ण, संघका पदाधिकारी विनित लोहिया, विनय काब्रा, सर्वोत्तम गिरी र उमेश श्रेष्ठ लगायतको उपस्थिति थियो ।
यसअघि सूर्य नेपालले पनि कम्प्युटर, ल्यापटप र प्रिन्टर उपलब्ध गराएको थियो । औषधी उत्पादक संघको यो सहयोगले महानगरको सेवा पुनःसञ्चालन प्रयासमा थप गति दिने र उद्योग–महानगरबीचको साझेदारी सम्बन्ध अझ सुदृढ हुने विश्वास लिइएको छ ।
