जनकपुरधाम । मधेश प्रदेशकी प्रदेश प्रमुख सुमित्रा सुवेदी भण्डारीले नेपालको संविधानको धारा १६८ को उपधारा (२) बमोजिम जितेन्द्र प्रसाद सोनार (सोनल)लाई मधेश प्रदेशको नयाँ मुख्यमन्त्री नियुक्त गर्नुभएको छ।
प्रदेश प्रमुखको कार्यालय, जनकपुरधामबाट बुधबार जारी विज्ञप्तिअनुसार सोनललाई प्रदेश सभामा प्रतिनिधित्व गर्ने पाँच राजनीतिक दलका ५६ जना प्रदेश सभा सदस्यहरूको समर्थनमा मुख्यमन्त्रीमा नियुक्त गरिएको हो।
विज्ञप्तिमा जनाइएअनुसार, जनता समाजवादी पार्टी नेपाल, जनमत पार्टी, नेकपा (माओवादी केन्द्र), लोकतान्त्रिक समाजवादी पार्टी नेपाल र नेकपा (एकीकृत समाजवादी) गरी पाँच राजनीतिक दलको समर्थनसहित सोनारले बहुमतको दाबी पेश गर्नुभएको थियो।
यसअघि प्रदेश प्रमुख भण्डारीले संविधानको धारा १६८(२) बमोजिम बहुमत दाबी गर्न प्रदेश सभाका सदस्यहरूलाई असोज २९ गते दिउँसो ४ बजेभित्र दावी पेश गर्न आह्वान गर्नुभएको थियो। उक्त आह्वानपछि सोनलले आवश्यक समर्थनका दस्तावेजहरू सहित दाबी पेश गरेपछि उनलाई औपचारिक रूपमा मुख्यमन्त्री पदमा नियुक्त गरिएको हो।
प्रदेश प्रमुख भण्डारीले जारी गरेको नियुक्तिपत्रमा भनिएको छ, “नेपालको संविधानको धारा १६८ को उपधारा (२) बमोजिम तपाईँलाई मधेश प्रदेशको मुख्यमन्त्री पदमा नियुक्त गरिएको छ। मुख्यमन्त्री पदमा नियुक्त हुनु भएकोमा हार्दिक बधाई छ र कार्यकालको सफलताको कामना गर्दछु।”
नयाँ मुख्यमन्त्री सोनार बारा जिल्लाबाट निर्वाचित प्रदेश सभा सदस्य हुन्। उनले अब संविधानको व्यवस्था अनुसार शपथग्रहण गरेर सरकार गठन प्रक्रिया अघि बढाउनेछन्।
