काठमाडौँ । सरकारले मापदण्डभन्दा बढी सुरक्षाकर्मी प्रयोग गर्दै आएका पूर्वप्रधानमन्त्री तथा नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल (प्रचण्ड) को सुरक्षामा कटौती गरेको छ ।
गृह मन्त्रालयका उच्च स्रोतका अनुसार, ओलीको सुरक्षार्थ खटिएका २८ जना र दाहालको सुरक्षार्थ खटिएका ३४ जना सुरक्षाकर्मी बिहीबारदेखि फिर्ता बोलाइएका छन् । प्रचण्डको सुरक्षामा हालसम्म ५२ जना सुरक्षाकर्मी खटिएका थिए ।
मन्त्रालयले यो निर्णय “विशिष्ट व्यक्ति सुरक्षा कार्यविधि” अनुसार गरेको जनाएको छ । सो कार्यविधिमा पूर्वप्रधानमन्त्री तथा उच्च पदस्थ व्यक्तिहरूको सुरक्षाका लागि निश्चित मापदण्ड तोकिएको भए पनि ओली र दाहाल दुबैको सुरक्षामा सोभन्दा बढी सुरक्षाकर्मी परिचालन गरिएको पाइएको थियो ।
गृह मन्त्रालयका अनुसार, सुरक्षामा गरिएको यो कटौतीले सुरक्षा निकायभित्र अनुशासन, पारदर्शिता र समान मापदण्डको कार्यान्वयन सुदृढ गर्ने सन्देश दिने उद्देश्य राखिएको छ ।
तर एमाले र माओवादी केन्द्रका नेताहरूले भने यस कदमलाई राजनीतिक उद्देश्यप्रेरित निर्णयको रूपमा व्याख्या गर्न थालेका छन् ।
