वीरगंज । राप्ती स्वास्थ्य विज्ञान प्रतिष्ठान, घोराहीका तत्कालीन उपकुलपति प्रा.डा. संगिता सिंह भण्डारी, तत्कालीन कार्यवाहक रजिष्ट्रार झन्कार लामिछानेसहित १३ जनाविरुद्ध गैरकानूनी लाभ उठाई संस्थालाई हानी पु-याएको आरोपमा भ्रष्टाचार मुद्दा दायर गरिएको छ।
विशेष अदालतमा दायर गरिएको आरोपपत्रअनुसार, उनीहरूलाई प्रतिष्ठानका नाममा एमआरआई मेसिन खरिद प्रक्रियामा अनियमितता, बदनियतपूर्ण कार्य र सार्वजनिक खरिद ऐन तथा नियमावलीको उल्लङ्घन गरेको आरोप लागेको हो।
अनुसन्धानका क्रममा तत्कालीन उपकुलपति भण्डारीले खरिद आवश्यकताको पहिचान र गुरुयोजना नबनाई, निश्चित कम्पनीलाई फाइदा पुग्ने गरी प्राविधिक स्पेसिफिकेशन तयार गराएको, र एकै परिवारद्वारा सञ्चालित कम्पनीहरूबाट दररेट माग गरी लागत अनुमान तयार गरेको देखिएको आयोगले जनाएको छ।
त्यसैगरी, स्वीकृत प्रक्रिया बिना नै गोरखापत्रमा राष्ट्रियस्तरको बोलपत्र आह्वान गरिएको, अन्तर्राष्ट्रिय बोलपत्रका लागि प्रयोग हुने कागजात प्रयोग गरिएको, र लुम्बनी हेल्थ केयर प्रालिले पेश गरेको प्रस्ताव बमोजिम प्राविधिक स्पेसिफिकेशन संशोधन गरी खरिद प्रक्रिया अघि बढाइएको तथ्यसमेत उजागर भएको छ।
अनियमित मूल्याङ्कनका कारण सिपियु स्पेसिफिकेशनमा ९० प्रतिशतभन्दा बढी कार्यक्षमता घटाइएर पनि ‘Minor Deviation’ भन्दै स्वीकृत गरिएको बताइएको छ । सोही आधारमा ११ करोड ४५ लाख रुपैया लागतको प्रस्तावलाई सारभूत रुपमा न्यूनतम र प्रभावकारी ठहर गरी आशयपत्र प्रकाशन गरिएको थियो।
आयोगका प्रवक्ता राजेन्द्रकुमार पौडेलका अनुसार, आरोपितहरूले गैरकानूनी लाभ लिई संस्थालाई आर्थिक हानि पुर्याएको ठहर गरी भ्रष्टाचार निवारण ऐन अन्तर्गत मुद्दा दायर गरिएको हो ।
