वीरगंज । मधेश विश्वविद्यालय, वीरगंजका कानून तथा जनप्रशासन संकायका दोस्रो सेमेस्टरका विद्यार्थीहरूलाई बुधबार जिल्ला प्रहरी कार्यालय पर्सामा विशेष प्रशिक्षण तथा अन्तरक्रिया कार्यक्रम आयोजना गरिएको छ ।
कार्यक्रममा जिल्ला प्रहरी कार्यालय पर्साका प्रमुख प्रहरी उपरीक्षक सुदिप राज पाठकले “E-Governance र Digital Transformation” विषयमा विस्तृत प्रस्तुति दिएका थिए । उनले सूचना प्रविधिको युगमा सुशासन, पारदर्शिता, सेवा प्रवाह र प्रशासनिक दक्षता अभिवृद्धिमा डिजिटल प्रणालीको भूमिकाबारे प्रकाश पारे । प्रहरी प्रशासनमा डिजिटल प्रविधिको प्रयोगले ल्याएको परिवर्तनका अनुभव पनि उनले विद्यार्थीहरूसँग साझा गरे ।
पाठकले इ–गभर्नेन्सका मुख्य आधारहरू — सूचना प्रवाहको सरलता, नागरिकमैत्री सेवा, अनलाइन प्रणालीको प्रभावकारिता र प्रशासनिक जवाफदेहिता — बारे व्यावहारिक उदाहरणसहित व्याख्या गरे ।
कार्यक्रममा सहभागी विद्यार्थीहरूले प्रशासनिक सुधार, डिजिटल सेवा विस्तार, साइबर सुरक्षा र सार्वजनिक प्रशासनमा प्रविधिको प्रभावबारे प्रश्न राख्दै जिज्ञासा व्यक्त गरेका थिए ।
सो अवसरमा प्रहरी नायब उपरीक्षक किशोर लम्सालको समेत उपस्थिति रहेको थियो । कार्यक्रमपछि विद्यार्थीहरूले जिल्ला प्रहरी कार्यालयका विभिन्न शाखा — अपराध अनुसन्धान शाखा, ट्राफिक शाखा र नागरिक सहायता डेस्क — को अवलोकन गरे ।
विद्यार्थीहरूले यस प्रशिक्षणबाट प्रशासनिक प्रणालीको व्यावहारिक ज्ञान, प्रहरी प्रशासनको कार्यशैली र प्रविधिमुखी सेवा व्यवस्थापनबारे नजिकबाट बुझ्ने अवसर पाएको बताएका छन् ।
