जनकपुर । मधेश प्रदेशमा नयाँ सरकार गठनका लागि नेपाली कांग्रेस, नेकपा (एमाले) र जनमत पार्टीले संयुक्त रूपमा दाबी पेस गरेका छन् ।
बुधबार ती दलका नेताहरूले प्रदेश प्रमुखको कार्यालयमा उपस्थित भई नेपालको संविधानको धारा १६८ को उपधारा (२) बमोजिम बहुमतको सरकार गठनका लागि औपचारिक दाबी पत्र बुझाएका हुन् ।
दाबीपत्रमा नेपाली कांग्रेसका संसदीय दलका नेता कृष्णप्रसाद यादवलाई मुख्यमन्त्रीमा प्रस्ताव गरिएको छ । उनीसहितको गठबन्धनसँग नेकपा (एमाले) का २३, नेपाली कांग्रेसका २२ र जनमत पार्टीका १३ गरी कुल ५८ जना प्रदेश सभा सदस्यको समर्थन रहेको उल्लेख गरिएको छ ।
१०७ सदस्यीय मधेश प्रदेश सभामा सरकार गठनका लागि ५४ सदस्यको समर्थन आवश्यक पर्ने भएकाले गठबन्धनसँग स्पष्ट बहुमत रहेको दाबी गरिएको छ ।
प्रदेश प्रमुखलाई बुझाइएको पत्रमा नेकपा (एमाले) संसदीय दलका नेता सरोजकुमार यादव, नेपाली कांग्रेस संसदीय दलका नेता कृष्णप्रसाद यादव, र जनमत पार्टी संसदीय दलका नेता महेशप्रसाद यादवले हस्ताक्षर रहेका छन् ।
