वीरगंज । वीरगंज मेलामा मंगलबार राति ग्याङ फाइट हुँदा एक जनाको ज्यान गएको छ । मेलाको प्रमुख स्थल माईस्थान चौक र घडिअर्वा पोखरी बीचको गीता मन्दिर नजिक दुई समूहबीच भएको झडपमा अन्दाजी २४ वर्षीय ‘गोल्डेन’ नामक युवकको मृत्यु भएको पर्सा प्रहरीले पुष्टि गरेको छ ।
पर्सा प्रहरी प्रवक्ता डिएसपी हरिबहादुर बस्नेतका अनुसार, दुई समूहबीचको हानाहानमा गम्भीर घाइते भएका गोल्डेनलाई उपचारका लागि नारायणी अस्पताल लैजाने क्रममा राति नै मृत्यु भएको हो ।
प्रहरीले घटनामा संलग्न रहेको आशंकामा ६ जनालाई नियन्त्रणमा लिएको छ । तर अनुसन्धानको क्रममा भएकाले उनीहरूको नाम गोप्य राखिएको प्रहरीले जनाएको छ ।
“झगडाको वास्तविक कारण अझै खुलेको छैन । नियन्त्रणमा लिइएकाहरुसँग सोधपुछ भइरहेको छ,” प्रवक्ता बस्नेतले जानकारी दिए ।
घटनापछि मेलाको सुरक्षा व्यवस्थामाथि गम्भीर प्रश्न उठेको छ । दशैं तिहार लक्षित विशेष सुरक्षा योजनाअन्तर्गत मेलाका लागि ११ सय सुरक्षाकर्मी परिचालन गरिएको प्रहरीको दाबी भए पनि मेलाको मुख्य चोक नजिकै भएको घटनामा एक युवकको ज्यान जानुले सुरक्षा व्यवस्थामाथि ठुलो प्रश्न उठाएको छ ।
मृतक गोल्डेनको शव पोस्टमार्टमका लागि नारायणी अस्पतालमा राखिएको छ ।
