वीरगंज । पर्साको बहुवरीबाट उद्धार गरिएकी गर्भवती महिलाले आज मंगलबार साँझ ५:२३ बजे नारायणी अस्पतालमा सुरक्षित रूपमा छोरीलाई जन्म दिएकी छन्।
गत असोज ११ गते शनिबार राति करिब ९ बजे वडा प्रहरी कार्यालय विर्ताका प्रहरी सहायक निरीक्षक भुलेन्द्र गिरि तथा मानवसेवा आश्रम वीरगंज शाखाका अभिभावक एवं सामाजिक अभियन्ता प्रकाश थारुले अन्दाजी ३० वर्षकी ती महिलालाई उद्धार गरी आश्रममा ल्याएका थिए। महिलाले आफ्नो नाम–थर स्पष्ट बताउन नसक्ने अवस्था रहेको आश्रमले जनाएको छ।
आज असोज १४ गते बेलुकी ४ बजे पेट दुखेपछि उनलाई तत्काल नारायणी अस्पताल पुर्याइएको थियो। उपचारपछि साँझ ५:२३ बजे उनले छोरी जन्माएकी हुन्।
नारायणी अस्पतालमा शिशु जन्मदिने बेला मानवसेवा आश्रम वीरगंजका संस्थापक अभियन्ता देवेश गुप्ता, अभिभावक एवं सामाजिक अभियन्ता प्रकाश थारु, सामाजिक अभियन्ता पिया सिंह, आश्रमका केन्द्रिय सदस्य विवेक महतो, स्वयंसेवकहरू विकास माली, अंशु क्षेत्री, संगीता परियार, प्रहरी जवान नगेश्वर यादव, ओमकुमार झा र दिपेन्द्र चौधरीको उपस्थिति रहेको थियो।
मानवसेवा आश्रमका संस्थापक अभियन्ता देवेश गुप्ताले सुन्दर समन्वयका लागि आदरणीय हेमा थापा साथै सम्पूर्ण अस्पताल परिवारप्रति आभार प्रकट गरेका छन्।
