वीरगंज । वीरगंज महानगरपालिकाको प्रशासनिक कामकाज सहज बनाउन सूर्या नेपाल प्रा.लि.ले कम्प्युटर, ल्यापटप, प्रिन्टरसहितका विद्युतीय सामग्री सहयोग गरेको छ ।
गत भदौ २४ गतेको जेनजि आन्दोलनका क्रममा लुटपाट, तोडफोड र आगजनी हुँदा वीरगंज महानगरपालिकाको भवनसहित भौतिक सामग्री जलेर नष्ट भएपछि दैनिक प्रशासनिक कामकाज प्रभावित भएको थियो । यही अवस्थालाई मध्यनजर गर्दै सूर्या नेपालले आफ्नो सामाजिक उत्तरदायित्व (CSR) अन्तर्गत दुई थान कम्प्युटर सेट (युपिएससहित), दुई थान ल्यापटप र दुई थान प्रिन्टर हस्तान्तरण गरेको हो ।
सामग्री हस्तान्तरण कार्यक्रममा बोल्दै वीरगंज महानगर प्रमुख राजेशमान सिंहले असहज अवस्थामा रहेको कार्यालयलाई पुनःसञ्चालन गर्न सूर्या नेपालले पुर्याएको सहयोग महत्त्वपूर्ण भएको बताए । उनले भविष्यमा पनि महानगर र सूर्या नेपालबीच सहकार्य र साझेदारी निरन्तर रहोस् भन्ने अपेक्षा व्यक्त गरे ।
सो अवसरमा सूर्या नेपाल प्रा.लि.का प्रभाकर विक्रम शाहले नगरपालिकाको सम्पत्ति जल्नु भनेको नागरिककै सम्पत्ति नष्ट हुनु भएकाले समस्याको घडीमा सहयोग गर्न सधैं तत्पर रहेको बताए ।
यस्तै, उद्योग प्रमुख सुरेश काजी श्रेष्ठले सूर्या नेपालले सामाजिक उत्तरदायित्व अन्तर्गत वीरगंज महानगरलाई सहयोग गर्न पाउँदा खुशी लागेको बताए ।
सामग्री हस्तान्तरण कार्यक्रममा महानगरका निमित्त प्रमुख प्रशासकीय अधिकृत अरविन्द लाल कर्ण, सूर्या नेपालका सिनियर म्यानेजर यज्ञ आलेसहितका व्यक्तिहरूको उपस्थिति थियो ।
