काठमाडौँ । प्रधानमन्त्री तथा मन्त्रिपरिषद्को कार्यालयमा मंगलबार प्रधानमन्त्री सुशीला कार्की र निर्वाचन आयोगका पदाधिकारीहरूबीच प्रतिनिधि सभा निर्वाचन २०८२ फागुन २१ गते सम्पन्न गर्ने तयारीका विषयमा विस्तृत छलफल भएको छ।
प्रधानमन्त्री कार्कीले निर्वाचन स्वच्छ, स्वतन्त्र, भयरहित, निष्पक्ष र मितव्ययी रूपमा सम्पन्न गर्नु नेपाल सरकारको उच्च प्राथमिकता भएको बताउँदै, निर्वाचनका लागि आवश्यक स्रोत साधन र जनशक्ति उपलब्ध गराइने, शान्तिसुरक्षाको भरपर्दो व्यवस्था मिलाइने र अनुकूल वातावरण तयार गर्न सरोकारवालाहरूसँग छलफल हुने जानकारी दिनुभयो।
निर्वाचन आयोगको तर्फबाट कार्यवाहक प्रमुख निर्वाचन आयुक्त राम प्रसाद भण्डारीले मतपेटिका लगायत आवश्यक निर्वाचन सामग्री मौज्दातमा रहेको र अन्य आवश्यक सामग्री स्वदेशमै उत्पादन गरी खरिद गरिने प्रतिबद्धता व्यक्त गर्नुभयो। साथै, राजनीतिक दल, नागरिक समाज र सरोकारवालाहरूसँग समन्वय गरिने र नेपाल सरकारबाट सुरक्षित वातावरणको व्यवस्था मिलाइने कुरा उल्लेख गर्नुभयो।
छलफलमा अर्थमन्त्री रामेश्वर प्रसाद खनाल, गृह मन्त्री ओम प्रकाश अर्याल, कानून, न्याय तथा संसदीय मामिला मन्त्री अनिल कुमार सिन्हा, मुख्य सचिव एकनारायण अर्याल लगायत सम्बन्धित अधिकारीहरूको उपस्थिति रहेको थियो। आयोगतर्फ निर्वाचन आयुक्त डा. जानकी कुमारी तुलाधर, सगुन सम्शेर ज.ब.रा. र सचिव माहादेव पन्थ उपस्थित थिए।
