वीरगंज । जेनजी आन्दोलनका क्रममा गत भदौं २४ गते तोडफोड र आगजनीबाट क्षतिग्रस्त बनेको वीरगंजको घण्टाघरस्थित नेपाल प्रहरीको बिट संरचना स्थानीय युवाहरूको पहलमा पुनर्निर्माण गरी पुनः सञ्चालनमा ल्याइएको छ।
‘आफ्नै देश आफै बनाऔँ’ भन्ने नारासहित वीरगंजका युवाहरूले प्रहरी र जनताबीचको विश्वास पुनःस्थापित गर्ने उद्देश्यले यो अभियान सञ्चालन गरेका हुन्। नेशनल इन्फोटेक कलेज र गौतम स्कुलका विद्यार्थीहरू, नेपाल फर्मास्युटिकल लिमिटेडका कर्मचारी तथा एलाइड यूथ क्लबका युवाहरूले मिलेर प्रहरी बिटलाई आवश्यक सामग्री उपलब्ध गराएका छन्।
पुनर्निर्माणमा टेबल, कुर्सी, दराज, पंखा, पानीको ट्यांकी, आवश्यक विद्युतीय सामग्री, साथै तोडफोड भएका झ्याल र ढोकाहरू प्रतिस्थापन गरिएका छन्। साथै भवनको रंगरोगन गरी प्रहरी बिटलाई पुरानै अवस्थामा ल्याइएको छ।
यस अभियानको नेतृत्व एलाइड यूथ सोसाइटीका संस्थापक ओमकुमार झाले गरेका थिए। उनले प्रहरी र जनताबीचको सम्बन्धमा सुधार ल्याउन युवाहरूले अग्रसरता देखाएको र भविष्यमा पनि यस्ता रचनात्मक कार्यलाई निरन्तरता दिने प्रतिबद्धता व्यक्त गरे।
नेशनल इन्फोटेक कलेजका प्रतिनिधि तथा युवा नेता सुधीर पटेलले जेनजी आन्दोलनका क्रममा केही उच्छृंखल व्यक्तिहरूबाट भएको तोडफोड र आगजनी दुर्भाग्यपूर्ण भएको बताउँदै, “युवाहरूले समाजप्रति जिम्मेवार बन्दै प्रहरी बिट पुनर्निर्माणमा सक्रिय सहयोग गरेका छन्, यो सकारात्मक कदम हो,” भने।
