सर्लाही । झूटा विवरण पेश गरी नेपाली नागरिकता प्रमाणपत्र लिन सहयोग गरेको आरोपमा सर्लाही पर्सा गाउँपालिका–४ का वडाध्यक्ष सुवोध राय यादव पक्राउ परेका छन् ।
चार जना व्यक्तिले झूटा वतन र विवरण प्रस्तुत गरी वडा अध्यक्ष यादवबाट सिफारिस तथा सनाखत गराई जिल्ला प्रशासन कार्यालय सर्लाहीबाट नेपाली नागरिकताको प्रमाणपत्र लिएको र लिन खोजेको आरोपमा अनुसन्धान सुरु गरिएको प्रहरीले जनाएको छ ।
जिल्ला प्रशासन कार्यालय सर्लाहीको च. नं. ११२९१ मिति २०८१।०३।०३ को पत्रका आधारमा जिल्ला प्रहरी कार्यालय सर्लाहीमा नागरिकता सम्बन्धी मुद्दा दर्ता भई अनुसन्धान भइरहेको छ ।
यसै क्रममा जिल्ला प्रहरी कार्यालय सर्लाहीले आइतबार वडाध्यक्ष यादवलाई पक्राउ गरी आवश्यक अनुसन्धान अगाडि बढाइरहेको जनाएको छ । पक्राउ परेका वडाध्यक्ष यादवलाई सर्लाही जिल्ला अदालतबाट १५ दिनको म्याद थप अनुमति लिई अनुसन्धान भइरहेको जिल्ला प्रहरी कार्यालय सर्लाहीका प्रहरी नायब उपरीक्षक सरोज राईले जानकारी दिए ।
