वीरगंज । वीरगंज महानगरपालिकाअन्तर्गत हरपतगन्ज हाइवे, अपौनी, उदयपुर–घुर्मी, सौराहालगायतका टोलहरू जोड्ने करिब आठ किलोमिटर सडक निर्माण कार्य आठ वर्षदेखि अलपत्र पर्दा स्थानीयवासी मर्कामा परेका छन्।
सघन सहरी तथा भवन निर्माण कार्यालय वीरगंजमार्फत सडक निर्माणकाे लागि स्वच्छन्द/पप्पु/युनाइटेड बिल्डर्स जेभी वीरगंजले ठेक्का पाएका हुन् । स्थानियका अनुसार ठेकेदार कम्पनीले सडक खनेर अधुरै छाड्दा सडकमा पानी जम्ने, फोहोर संकलन हुने र आवतजावतमा गम्भीर समस्या हुने अवस्था बनेको छ ।
वडा नम्बर २० अपौनी निवासी स्थानीय बिक्की सिंहले पटकपटक आग्रह गर्दा पनि आयोजना कार्यालय र ठेकेदार कम्पनीले सुनुवाइ नगरेको गुनासो गरे । ठेकेदार कम्पनीको आन्तरिक विवादले आयोजनाको काम अदालतमा पुगेकाले थप ढिलाइ भएको सघन सहरी तथा भवन निर्माण कार्यालयका कर्मचारीहरूले बताएका छन् ।
गत आर्थिक वर्ष ०७४/७५ मा ८४ करोड ९८ लाख ५३ हजारमा सम्झौता भएको उक्त आयोजनाको म्याद पाँचपटक बढाइए पनि हालसम्म ७५ प्रतिशत मात्र भौतिक प्रगति भएको सूचना अधिकारी राजन जैसवालले जानकारी दिए । ठेकेदार कम्पनीले हालसम्म ५९ प्रतिशत भुक्तानी (५४ करोड ११ लाख) लिइसकेको र भिओका कारण लागत ९१ करोड ४७ लाख पुगेको उनले बताए ।
यसैबीच वीरगंज महानगरपालिका–२० का वडाध्यक्ष रामकिशोर सिंह परागले पर्साका प्रमुख जिल्ला अधिकारीमार्फत सहरी विकासमन्त्री कुलमान घिसिङलाई ज्ञापनपत्र बुझाउँदै तत्काल ग्राभेल बिछ्याई सडक सञ्चालनयोग्य बनाउन माग गरेका छन् । उनका अनुसार खाल्डो खनेर छाडिएकाले स्थानीयहरू हैजा, मलेरिया र डेंगुजस्ता रोगको जोखिममा रहेको गुनासो छ।
प्रमुख जिल्ला अधिकारी तोयनारायण सुवेदीले लामो समयदेखि अलपत्र रहेको उक्त आयोजनाको निरीक्षण गरेर ठेकेदार कम्पनी र आयोजना प्रमुखलाई कानुनी दायरामा ल्याउने चेतावनी दिएका छन् । उनले अब यस विषयलाई गम्भीर रूपमा लिएर ठोस निष्कर्षमा पुग्ने र काम अगाडि बढाउन निर्देशन दिने बताए ।
