वीरगंज । विश्व हिन्दु परिषद् पर्साले नेपालमै पहिलो पटक भव्य चुनरी यात्राको तयारी पूरा गरेको जनाएको छ । परिषद्को नगर समितिका सचिव दिपेन्द्र कुमार सर्राफले आइतबार पत्रकार सम्मेलनमार्फत जानकारी दिँदै भोलि सोमबार (घटस्थापनाको दिन) दिउँसो ३ बजेदेखि करिब १५ सय भक्तजनहरूको सहभागितामा १५१ मिटर लामो माताको चुनरी यात्रा निस्कने बताए ।
उनका अनुसार भारतका विभिन्न राज्यहरूमा विशेषगरी घटस्थापनाको दिन निकालिने चुनरी यात्रालाई यसपालि पहिलो पटक वीरगंजस्थित गहवामाई मन्दिरमा आयोजना गरिएको हो । भक्तजनहरूले हातमा बोकेको चुनरीमार्फत आशीर्वाद प्राप्त गर्ने धार्मिक मान्यता रहेको पनि उनले जानकारी दिए ।
चुनरी यात्रा नगर परिक्रमा गर्दै पुनः माईस्थानमा पुगेर विशेष पूजा–आराधनासहित सम्पन्न गरिने सर्राफले बताए । उनले यो यात्रा देश र समाजको हित र मंगलकामनाका लागि आयोजना गरिएको र यसका लागि कुनै आर्थिक सहयोग कसैबाट नलिएको स्पष्ट पार्दै सम्पूर्ण हिन्दु श्रद्धालुहरूलाई यस ऐतिहासिक यात्रामा सहभागी हुन आग्रह गरे ।
