वीरगंज । जेनजी आन्दोलनका क्रममा भएको तोडफोड र आगजनीका कारण आन्तरिक राजस्व कार्यालय वीरगंजमा करिब रु एक करोड मूल्य बराबरका कम्प्युटर तथा अन्य विद्युतीय उपकरणमा क्षति पुगेको छ।
गत भदौ २४ गतेको आगजनीका कारण कार्यालयको भवनका विभिन्न कोठामा समेत ठूलो क्षति भएको छ । आन्तरिक राजस्व कार्यालयका सूचना अधिकारी रामेश्वरकुमार मिश्रका अनुसार कर सङ्कलन शाखामा सबैभन्दा बढी क्षति भएको छ ।
“कार्यालयका कम्प्युटर, प्रिन्टरलगायतका विद्युतीय उपकरणहरू आगजनीले जल्नुका साथै केही लुटपाट पनि भएको छ,” उनले जानकारी दिए । कार्यालयका अनुसार भवनको तल्लो तलाका अधिकांश संरचनामा क्षति पुगेको छ र एउटा कोठा पूर्णरूपमा जलेर नष्ट भएको छ ।
