वीरगंज । पर्साको वीरगञ्ज महानगरपालिका वडा नं. २० का वडाध्यक्ष रामकिशोर सिंह परागले ८ वर्षदेखि खाल्डो खनेर अलपत्र छोडिएको सडक निर्माण कार्य तत्काल सम्पन्न गर्न माग गरेका छन् ।
सिंहले पर्साका प्रमुख जिल्ला अधिकारीमार्फत सहरी विकास मन्त्री कुलमान घिसिङलाई ज्ञापनपत्र बुझाउँदै हरपतगंज हाईवे, अपौनी, उदयपुर घुर्मि, सौराहा लगायतका टोलहरू जोड्ने करिब ८ किलोमिटर लामो सडक वर्षौंदेखि अधुरो रहेकाले तत्काल ग्रेभल बिछ्याई सञ्चालनयोग्य बनाउन आग्रह गरेका हुन् ।
उनका अनुसार कन्ट्राक्ट नम्बर DUDBC/Parsa/2074-075/NCB-08 अन्तर्गत पर्ने उक्त सडक ठेक्का लिएर ठेकेदारले गहिरो खाल्डो खनेपछि छाडेपछि स्थानीयहरू हैजा, मलेरिया र डेगुँजस्ता रोगको जोखिममा परेका छन् । सडकमा जमेको पानी र फोहरले आवतजावतमा समेत गम्भीर समस्या उत्पन्न भएको उनले बताए ।
वडाध्यक्ष सिंहले विगत ८ वर्षमा १३ पटकसम्म समय दिइए पनि काम पूरा नभएको गुनासो गर्दै, मन्त्रालयको पहलमा अपूरा काम सम्पन्न गर्न तथा तत्काल ग्रेभल बिछ्याई बाटो चलायमान हुने व्यवस्था मिलाउन आग्रह गरेका छन् ।
यसअघि सघन सहरी तथा भवन निर्माण आयोजना कार्यालय, वीरगञ्ज महानगरपालिका र जिल्ला प्रशासन कार्यालयलाई पटक–पटक जानकारी गराए पनि ठोस पहल नभएको वडाध्यक्षको भनाइ छ ।
