वीरगंज । जेनजी समूहको आन्दोलन र प्रदर्शनपछि अस्तव्यस्त बनेको पर्साका सरकारी कार्यालय र शैक्षिक संस्थाहरू क्रमशः सामान्य अवस्थामा फर्किन थालेका छन् । गत भदौ २३ र २४ गतेका विषम परिस्थितिले यहाँको सेवाप्रवाह र विद्यालयको पठनपाठन ठप्प पारिसकेको थियो ।
पर्साका सहायक प्रमुख जिल्ला अधिकारी सुमनकुमार कार्कीले आइतबारदेखि जिल्लाका सबै सरकारी कार्यालयले नियमित सेवा प्रवाह सुरु गरेको जानकारी दिए । उनले भने, “आन्दोलनका कारण प्रभावित भएका कार्यालयले सेवा पुनःसञ्चालनको योजना बनाई यथाशक्य छिटो सेवा प्रदान गर्नुपर्नेछ।”
त्यसैगरी, वीरगंज महानगर शैक्षिक प्रशासन महाशाखाले पनि विद्यालय खोलेर आवश्यक सरसफाइ र सुरक्षा उपाय अपनाउँदै पठनपाठन कार्य सुरु गर्न अनुरोध गरेको छ । महाशाखा प्रमुख आनन्द लामिछानेले विद्यालयको खानेपानीमा अनिवार्य क्लोरिन राख्न र विद्यालय परिसर सरसफाइ गर्न निर्देशन दिएको उल्लेख गरे ।
जिल्ला प्रशासन कार्यालयले शनिबारदेखि निषेधाज्ञा राति मात्रै कायम राखेको छ भने बजार क्षेत्रमा सर्वसाधारणको चहलपहल बढ्दै गएको छ । आन्दोलनका क्रममा आन्तरिक राजश्व कार्यालय, नेपाल टेलिकम, र वीरगंज महानगरपालिकाका कार्यालयमा भएकाे ताेडफाेड र आगजनीका कारण क्षतिग्रस्त भएका छन् ।
