वीरगंज । जेनजी आन्दोलनपछि पहिलोपटक वीरगंज महानगरपालिकाका मेयर राजेशमान सिंहले महानगरपालिका कार्यालयको स्थलगत अवलाेकन गर्नुभएको छ । आन्दोलनका क्रममा प्रदर्शनकारीहरूले जलाएका कार्यालयका संरचना, गाडी र अन्य सामग्रीहरूको अवलाेकन गर्दै मेयर सिंहले तत्काल सेवा सञ्चालनका विषयमा छलफल गरेका हुन् ।
मेयर सिंहले महानगरको मुख्य प्रशासनिक भवनमा पुगेर मेयर, उपमेयर र प्रमुख प्रशासकीय अधिकृत बस्ने कोठासहित क्षतिग्रस्त स्थानहरू अवलोकन गरे । उनले कर्मचारीहरूलाई अत्यावश्यक सेवाहरू छिट्टै सुचारु गर्न निर्देशन दिँदै भने, “प्रशासनिक भवन पूर्णरूपमा क्षति भएको हुँदा कार्यालय सञ्चालन चुनौतीपूर्ण छ।”
आन्दोलनका क्रममा सार्वजनिक सम्पत्तिमा भएको आगजनी र लुटपाटप्रति दुःख व्यक्त गर्दै मेयर सिंहले भने, “आन्दोलनको नाममा सार्वजनिक सम्पत्ति जलाउने कार्य जेनजी पुस्ताले गरेको होइन, यसमा घुसपैठ भएको हुन सक्छ।”
महानगरवासीलाई अपिल गर्दै उनले भने, “यदि कसैसँग महानगरको सामान पुगेको छ भने फिर्ता गर्नुस्, वा त्यसको जानकारी सुरक्षाकर्मीलाई दिनुस्।”
मेयर सिंहले अत्यावश्यक सेवाहरू छिट्टै सञ्चालन गर्न महानगरको टिम सक्रिय रहेको जनाउँदै चाँडै सेवा सुचारु हुने विश्वास व्यक्त गरे । महानगरपालिकाले अझै क्षतिकाे विवरण संकलन भइरहेकाे जनाएकाे छ । जेनजि प्रदर्शनकाे नाममा भएकाे महानगरपालिकामा भएकाे आजगनीले मेयर, उप मेयर सहितका दुई दर्जन भन्दा बढी गाडी जलेर पूर्ण रुपले नष्ट भएकाे बुझिएकाे छ ।
