काठमाडौँ । नियुक्त भएको तेस्रो दिन कार्यभार सम्हालेकी अन्तरिम प्रधानमन्त्री सुशीला कार्कीले देशवासीलाई सम्बोधन गर्दै जेन जी आन्दोलनका क्रममा भएका मानवीय र भौतिक क्षतिबारे गम्भीर धारणा व्यक्त गरेकी छन् । उनले आन्दोलनमा ज्यान गुमाएका व्यक्तिलाई शहीद घोषणा गर्दै प्रतिमृतक परिवारलाई १० लाख रुपैयाँ राहत दिने घोषणा गरिन् ।
प्रधानमन्त्री कार्कीले सिंहदरबारदेखि सर्वोच्च अदालतसम्मका कागजपत्र र भवनहरू क्षतिग्रस्त हुनु ठूलो चुनौती भएको उल्लेख गरिन् । “भवनहरू फेरि बनाउन सकिन्छ तर नष्ट भएका कागजपत्र र प्रमाणहरू पुनःस्थापना गर्न गाह्रो हुन्छ,” उनले भनिन् ।
उनले आन्दोलनको क्रममा राज्यका महत्त्वपूर्ण अंगहरूलाई लक्ष्यित गरिएको भन्दै छानबिन गरी दोषीमाथि कारबाही हुने चेतावनी दिइन् । आन्दोलनका क्रममा ७२ जनाको ज्यान गएको र १९१ जना घाइते भएको मुख्यसचिव एकनारायण अर्यालले प्रस्तुत गरेको तथ्यांक पनि उनले उद्धृत गरिन् ।
कार्कीले आन्दोलनमा क्षति व्यहोरेका उद्योगी व्यवसायीलाई पनि राज्यले बेवास्ता नगर्ने बताइन् । “हामी विचार गर्छौँ कि उनीहरूलाई कसरी उठाउने, कुन सहयोग गर्ने,” उनले भनिन् ।
पहिलो पटक महिला प्रधानन्यायाधीश बनेर इतिहास बनाएकी कार्कीले रहरले नभई परिस्थितिको कारण कार्यकारी भूमिकामा आएको बताइन् । आगामी फागुन २१ गते आमनिर्वाचन गराउने जिम्मेवारी पूरा गर्ने प्रतिवद्धता व्यक्त गर्दै उनले छ महिनाभित्रै अन्तरिम सरकारको कार्यकाल सकिने स्पष्ट पारिन् ।
जेन जी पुस्ताले उठाएका मागहरू– भ्रष्टाचार अन्त्य, सुशासन र आर्थिक समानता– पूरा गर्न सरकार गम्भीर रहेको उल्लेख गर्दै कार्कीले “सबै निकायको साथ र सहयोग विना यो सम्भव छैन” भन्नेमा जोड दिइन् ।
