वीरगंज । जेन जि पर्साको आह्वानमा शनिबार साँझ वीरगंजको माइस्थानमा श्रद्धाञ्जली सभा सम्पन्न भएको छ । जेन जि आन्दोलनका क्रममा ज्यान गुमाएका वीरगंजका असहाव आलम ठकुराईलगायत सहादत प्राप्त सबैप्रति दीप प्रज्वलन गर्दै श्रद्धाञ्जली अर्पण गरिएको हो ।
काठमाडौँमा जेन जि प्रदर्शनको क्रममा प्रहरीले चलाएको गोली लागेर वीरगंज महानगर–१२ का २२ वर्षीय असहाव ठकुराईको मृत्यु भएको थियो । असहाव दुई महिनाअघि मात्रै भारतको विहार, पूर्वी चम्पारणको आदारपुर नजिकै बेल्दर्वाकी रोक्सिता खातुनसँग वैवाहिक जीवनमा बाँधिएका थिए । तर वैवाहिक जीवन प्रारम्भ गरेको छोटो समयमै उनी आन्दोलनकै क्रममा सहादत प्राप्त गरेका हुन् ।
असहाव विगत तीन वर्षदेखि अध्ययन तथा रोजगारीका सिलसिलामा काठमाडौँमा बस्दै आएका थिए । गत मङ्गलबार बिहान पठाओमार्फत यात्रुलाई गोङ्गबु लैजाने क्रममा प्रहरीले चलाएको गोली लागेर उनको मृत्यु भएको परिवारले जनाएको छ ।
उनी वीरगंजको ग्लोबल बिजनेस कलेजबाट कक्षा १२ (व्यवस्थापन) पास गरेर उच्च अध्ययन तथा रोजगारीका लागि राजधानी गएका थिए । असहाव मृत्युपछि उनकी आमा नजला खातुन र पत्नी रोक्सिता खातुन बारम्बार अचेत हुने गरेको छ । परिवारजनका अनुसार असहाव पाँच सन्तानमध्ये तेस्रो छोरा हुन् र आमाबुबाप्रति अत्यन्तै माया गर्ने स्वभावका थिए ।
छिमेकी मनोज गुप्ताका अनुसार असहाव मङ्गलबार बिहान १० बजेपछि सम्पर्कविहीन भएपछि खोजी गर्दा काठमाडौँको महाराजगञ्जस्थित शिक्षण अस्पतालमा उनको शव फेला परेको हो । “असहावको छाती र पेटमा दुई गोली लागेको देखिन्छ,” गुप्ताले बताए ।
माइस्थानमा आयोजित श्रद्धाञ्जली सभामा सयौँको संख्यामा स्थानीय नागरिक, युवाहरू र जेन जि अभियन्ताहरूको सहभागिता थियो । उनीहरूले दीप प्रज्वलन गर्दै असहावलगायत आन्दोलनमा ज्यान गुमाएका सबैप्रति श्रद्धाञ्जली अर्पण गरेका छन् ।
