वीरगंज । आम जनता पार्टी (आजपा) का अध्यक्ष प्रभु साहले जेन–जी पुस्ताको नेतृत्वमा भएको जन आन्दोलनलाई केवल नेतृत्वको अनुहार परिवर्तनमा सीमित गरी अघि बढ्ने धोकापूर्ण सम्झौता आफूहरूलाई स्वीकार्य नभएको बताएका छन्।
आज जारी विज्ञप्तिमा उनले समस्या केवल व्यक्तिमा नभई गलत संरचना र भ्रष्ट प्रणालीमा रहेको भन्दै केन्द्रदेखि प्रदेश र स्थानीय तहसम्म राज्यका निकाय दूषित भएको टिप्पणी गरे। “मेसिन परिवर्तन नगरी केवल म्यानेजर वा कारिन्दा बदल्दा उत्पादन बदलिँदैन जस्तै व्यवस्था नबदलिकन अवस्था बदलिँदैन,” विज्ञप्तिमा उल्लेख छ।
साहले जेन–जीको विद्रोहले सरकार, संसद र संविधानलाई नै अस्वीकार गरिसकेको अवस्थामा पुरानै प्रणालीलाई स्वीकार गर्नु जनादेशको अपमान हुने बताए। उनले आन्दोलनलाई कलंकित हुन नदिन वर्तमान व्यवस्थाको खारेजीसहित नयाँ व्यवस्था निर्माणको दिशामा अघि बढ्न आग्रह गरे ।
