वीरगंज । पर्साकाे जगरनाथपुर गाउँपालिका–१ पिडारीस्थित ऐलानी जग्गामा गरिएको वृक्षारोपण अज्ञात समूहले नष्ट गरेको छ। समृद्धिका लागि वन परियोजना अन्तर्गत गाउँपालिकाले लगाएका विरुवा बिहीबार राति उखेलेर र भाँचेर नष्ट गरिएको स्थानीय विनय द्विवेदीले जानकारी दिए।
१२ बिघा ऐलानी खाली जग्गामध्ये करिब ८ बिघामा आँप, कटहर, जामुन, खयरलगायतका फलफूल र बहुउपयोगी रूखका बिरुवा रोपिएका थिए । करिब एक महिना अघि मात्रै गरिएको वृक्षारोपण जेन–जेड आन्दोलनको मौकामा रातिकाे समयमा अज्ञात समूहद्वारा नष्ट गरिएको स्थानीयहरूले बताएका छन्।
स्थानीयवासीको अनुसार उक्त जग्गामा वृक्षारोपण राजनीतिक तथा धार्मिक प्रतिशोधका कारण हिजो राति अज्ञात समूहले नष्ट गरेको आशंका छ ।
एक महिना अघि वृक्षारोपण गर्ने क्रममा एक समुहले कबरिस्तान र गौचरको लागि खाली राख्नुपर्ने माग गर्दै विरोध जनाएका थिए। तर गाउँपालिकाले पुनः त्यही जमिनमा वृक्षारोपण गरेको थियो।
गाउँपालिका अध्यक्ष श्रीकान्त प्रसाद यादवका अनुसार सम्पन्न वृक्षारोपण कार्यक्रममा आँप, कटहर, जामुन, खयरलगायतका बहुउपयोगी रूखका बिरुवा रोपिएका थिए।
