काठमाडौँ । राष्ट्रिय स्वतन्त्र पार्टी (रास्वपा)ले तात्कालिक राजनीतिक परिस्थिति तथा आन्दोलनपछि बनेको परिस्थितिमा आफ्नो आधिकारिक प्रस्ताव सार्वजनिक गरेको छ।
रास्वपाले सुशासनको पक्षमा निर्णायक भूमिका खेलेको जेन–जी पुस्ताको अनिवार्य सहभागितामा सर्वपक्षीय सहमतिबाट प्रस्तावित प्रधानमन्त्री उम्मेदवारलाई समर्थन गर्ने जनाएको छ। पार्टीले उक्त उम्मेदवारले वृहत राजनीतिक अनुमोदन प्राप्त गर्ने शुभेच्छा व्यक्त गरेको छ।
रास्वपाले नेपालको संविधानको मर्म, संघीय गणतान्त्रिक शासन व्यवस्था, विधिको शासन, नागरिक सर्वोच्चता, बहुलवाद र मौलिक हकको प्रत्याभूति जस्ता आधारभूत लोकतान्त्रिक मूल्यमा कसैसँग सम्झौता नगर्ने स्पष्ट पारेको छ। संविधानको धारा ८३ अन्तर्गत संघीय व्यवस्थापिका दुई सदनात्मक रहने र राष्ट्रिय सभाको स्थायी स्वरूप कायम राखी आगामी ६ महिनाभित्र प्रतिनिधिसभाको निर्वाचन गर्नेगरी अन्तरिम सरकार गठन गर्नुपर्ने माग समेत गरेको छ।
रास्वपाले सम्माननीय राष्ट्रपतिज्यूको प्रत्यक्ष पहल र संवादमार्फत आसन्न संक्रमणकालीन राजनीतिक कोर्सलाई संरक्षकत्व दिइने अपेक्षा राखेको छ। साथै, संविधानको व्यापक संशोधन, भदौ २३ को आन्दोलनमाथिको दमन, निजी तथा सार्वजनिक सम्पत्तिमाथिको आक्रमण र भ्रष्टाचारका मुद्दाहरूको निष्पक्ष छानबिनका लागि नयाँ सरकार बनेको १५ दिनभित्र स्वतन्त्र आयोग गठन गर्न पनि माग गरेको छ।
यो प्रस्ताव रास्वपाका कार्यवाहक सभापति डोलप्रसाद अर्यालले जारी गरेका हुन्।
