वीरगंज । वीरगंज महानगरपालिकाका मेयर राजेशमान सिंहले हालै भएको Gen Z आन्दोलनमा राज्यद्वारा गरिएको दमनप्रति कडा आपत्ति जनाएका छन् । आफ्नाे सामाजिक सञ्जाल फेसबुकमार्फत प्रतिक्रिया दिँदै उनले २० जना युवाको ज्यान गएको र सयौँ घाइते भएको घटनालाई “सभ्य समाजले सहन नसक्ने आततायी कृत्य” भनेर व्याख्या गरेका छन्।
उनले भने, “यो केवल दमन मात्र होइन—युवाको भविष्यमाथि गरिएको प्रहार हो। अब केवल सरकारको राजीनामाले मात्र पुग्दैन; यस हत्याकाण्डको सम्पूर्ण जिम्मेवारी सरकारले लिनैपर्छ।”
मेयर सिंहले आफू युवाहरूको न्यायपूर्ण आन्दोलनमा पूर्ण ऐक्यबद्ध रहेको र आवश्यक परे सडकमा उत्रन पनि तयार रहेको बताएका छन् । तर, उनले संघर्ष सधैं शान्तिपूर्ण र संयमित रहनुपर्नेमा जोड दिँदै, “गलत तत्वहरूको घुसपैठ हुन नदिन सतर्क रहनुपर्छ” भन्ने अपिलसमेत गरेका छन्।
शान्तिपूर्ण आन्दोलनमा ज्यान गुमाउने युवाप्रति उनले श्रद्धाञ्जली अर्पण गर्दै, घाइतेहरूको शीघ्र स्वास्थ्य लाभको कामना गरेका छन्। साथै, शोकसन्तप्त परिवारजनप्रति समवेदना प्रकट गर्दै उनले भने, “युवाशक्ति नै परिवर्तनको शक्ति हो। युवापुस्ताले आँटेको यो संघर्ष सफल होस्, भविष्य उज्ज्वल होस्।”
