वीरगंज । मन्त्रीलाई फोनमा धम्की दिएको आरोपमा पक्राउ परेकी वीरगंज–१३ मुर्ली निवासी किरण साहले आफ्नाे परिवारका सदस्य पिडामा पर्दा आक्राेशमा आएर नबाेल्नु पर्ने शब्द आफुले मन्त्री जिलाई बाेलेकाे बताएकी छन् ।
कलैया उपमहानगरपालिका–२६, सिस्वा स्थायी घर भएकी साहले वीरगंजमा हैजाको प्रकोप बढ्दै गर्दा मन्त्रीसँग पटक–पटक सम्पर्क गर्न खोजे पनि फोन नउठाएपछि आक्रोश व्यक्त गरेकी वताइन । ११ भदौमा मन्त्रीसँगको संवादमा आफूले परिवारका सदस्य आइसियूमा भर्ना भएको पीडादायी अवस्था सुनाउँदा पनि मन्त्रीले ‘तथ्यांक छ ?’ भनेर प्रतिप्रश्न गरेको साहको भनाइ छ ।
त्यसपछि १३ भदौमा उनले मन्त्रीसँगको अडियो पत्रकारलाई उपलब्ध गराएपछि १४ भदौमा प्रहरीद्वारा पक्राउ गरिएकी थिइन् । साहका अनुसार जिम्मेवार व्यक्तिले जवाफदेही नदेखाएर उल्टै शक्ति प्रयोग गरेर आफूलाई हिरासतमा राख्न लगाएकाे आराेप समेत लगाइन ।
६ दिन हिरासतमा रहेकी साहले आफ्नो मोबाइल प्रयोग गरी व्यक्तिगत सामग्री सार्वजनिक गरिएको आरोप समेत लगाएकी छन्। उनले यसलाई प्रहरीद्वारा गरिएको गम्भीर दुरुपयोग भन्दै आपत्ति जनाएकी छन् ।
साहले आफू कुनै राजनीतिक पार्टीसँग आबद्ध नभएको, कलाकार बाहेक अन्य परिचय नभएको उल्लेख गर्दै सामाजिक न्यायका लागि आवाज उठाउँदा मात्र हिरासतमा पुग्नुपरेको बताइन् । अदालतमा मुद्दा छिटो किनारा लाग्ने विश्वास समेत उनले व्यक्त गरिन् ।
उनीमाथि लागेकाे विद्युतीय काराेबारकाे मुद्दा अहिले बिचारधिन अवस्थामा रहेकाे छ । उनी पर्सा जिल्ला अदालतकाे आदेशमा ५ हजार धराैटीमा तारिखमा छुटेकी हुन् ।
