काठमाडौं । सामाजिक सञ्जालमाथि सरकारले लगाएको प्रतिबन्धको विरोधमा नयाँ बानेश्वरमा गरिएको शान्तिपूर्ण प्रदर्शनबाट पाँच जना युवाहरूलाई प्रहरीले पक्राउ गरेको छ । अन्तर्राष्ट्रिय सम्मेलन केन्द्र अगाडि शनिबार ‘युथ कंग्रेस नेपाल’ले आयोजना गरेको सांकेतिक आन्दोलनका क्रममा उनीहरूलाई नियन्त्रणमा लिइएको हो ।
पक्राउ पर्नेहरूमा संस्थाका महामन्त्री प्रभात कुमार ठाकुर, कोषाध्यक्ष विराज अर्याल, केन्द्रीय सदस्यहरू सुजनराज गिरी र धिरज सञ्जेल, साथै सदस्य आशिष शर्मा रहेका छन् ।
उनीहरूले मुखमा मास्क र कालो टेप लगाएर सामाजिक सञ्जालमाथिको प्रतिबन्धविरुद्ध प्रतिरोध जनाएका थिए ।
युथ कंग्रेस नेपालले सामाजिक सञ्जालमाथि गरिएको प्रतिबन्धलाई अभिव्यक्ति स्वतन्त्रता र लोकतान्त्रिक मूल्य–मान्यतामाथिको आक्रमण भन्दै विरोधमा देशव्यापी अभियान चलाउने घोषणा गरेको छ ।
संस्थाले पक्राउ परेका सबै सदस्यहरूको बिना शर्त रिहाइको माग गर्दै जारी गरेको विज्ञप्तिमा भनिएको छ, “भविष्यमा यस्ता शान्तिपूर्ण आन्दोलनलाई गैर–लोकतान्त्रिक शैलीमा रोक्ने प्रयास नगर्न सम्बद्ध पक्षलाई सचेत गराउँछौं।”
संस्थाले सामाजिक सञ्जाल नागरिकको आवाज र स्वतन्त्रताको माध्यम भएको उल्लेख गर्दै सरकारले प्रतिगामी नीति अख्तियार गरेको आरोप लगाएको छ ।
