वीरगंज । हैजा रोग नियन्त्रणका लागि वीरगंज महानगरपालिकाले अन्तरक्रिया कार्यक्रमको आयोजना गरेको छ । उपप्रमुख इम्तियाज आलमको अध्यक्षतामा बसेको बैठकमा हैजासम्बन्धी सचेतना, रोकथाम र नियन्त्रणका उपायबारे सुझाव संकलन गरिएको थियो।
बक्ताहरूका अनुसार झाडापखाला जस्तो देखिने हैजा गम्भीर प्रकृतिको रोग हो, जसको लक्षण संक्रमण भएको केही घण्टादेखि पाँच दिनभित्र देखापर्न सक्छ । हैजाको मुख्य स्रोत फोहोर र दूषित पानी भएको बताउँदै सरसफाइमा विशेष ध्यान दिनुपर्नेमा जोड दिइयो । हैजाबाट बच्न शौचालय प्रयोग गर्ने, हात साबुनपानीले राम्रोसँग धुने, उमालेको वा फिल्टर गरिएको पानी मात्र खाने, तरकारी तथा सलाद सफा पानीले धोएर मात्र खाने जस्ता सुझावहरू प्रस्तुत गरिए ।
महानगरपालिकाले झाडापखाला र हैजाको प्रकोप देखिएपछि आफ्नै प्रयोगशालामार्फत खानेपानी परीक्षण सुरु गरेको छ। वडा नं. १०, ११ र १२ का विभिन्न धाराबाट पानीका नमुना संकलन गरी माइक्रोबायोलोजिस्ट अजय मण्डल नेतृत्वको प्राविधिक टोलीले परीक्षण कार्य अगाडि बढाएको उपप्रमुख आलमले जानकारी दिए ।
कार्यक्रममा जिल्ला प्रशासन कार्यालयका प्रमुख जिल्ला अधिकारी तोयानारायण सुवेदी, सहायक प्रमुख जिल्ला अधिकारी सुमन कुमार कार्की, नारायणी अस्पतालका मे.सु. डा. चुमन लाल दास, जिल्ला प्रहरी कार्यालय पर्साका प्रहरी नायब उपरिक्षक किशोर लम्साल, महानगरपालिकाका प्रशासन शाखा प्रमुख सुनिल कुमार कर्णलगायत सरोकारवाला निकायका प्रतिनिधिहरूको उपस्थिति थियो।
