वीरगंज । पर्सा जिल्लामा हैजाका बिरामीको संख्या क्रमशः घट्दै गए पनि छिमेकी जिल्ला बारामा नयाँ संक्रमित भेटिएको छ।
बाराको महागढीमाई नगरपालिका–८ का दुई बालबालिकामा हैजाको संक्रमण पुष्टि भएपछि स्वास्थ्य अधिकारीहरूले सतर्कता बढाएका छन् । ८ वर्षका एक बालक र ८ वर्षीया बालिकामा भदौ १६ गते कलैयास्थित प्रादेशिक अस्पतालमा भर्ना गरिएका थिए । आरडिटी परीक्षणबाट दुवैमा हैजा पुष्टि भएको स्वास्थ्य कार्यालय बाराका प्रमुख रामनरेश यादवले जानकारी दिए।
विशेष कुरा के छ भने ती बालबालिकाको वीरगंजसँग कुनै ट्राभल हिस्ट्री छैन । यसअघि बारा जिल्लाका संक्रमित सबै वीरगंजसँग जोडिएका थिए, तर यो पहिलो पटक संक्रमण स्थानीय स्तरमै देखिएको स्वास्थ्य अधिकारीहरूले बताएका छन्। हाल बारा जिल्लाबाट ८ जना संक्रमित पुष्टि भइसकेका छन्। तीमध्ये तीन जना डिस्चार्ज भइसकेका छन् भने पाँच जना अस्पतालमा उपचाररत छन्।
पर्सामा भने हैजा र झाडापखालाका बिरामीको संख्या घट्दै गएको स्वास्थ्य कार्यालय पर्साले जनाएको छ। भदौ १६ गते बुधबार ३१ जना नयाँ झाडापखालाका बिरामी भर्ना भएका थिए, तीमध्ये एक जनामा मात्र हैजा पुष्टि भएको जनस्वास्थ्य अधिकृत जयमोद ठाकुरले बताए।
स्वास्थ्य कार्यालय पर्साका अनुसार, भदौ ६ गतेदेखि १८ गतेसम्म वीरगंज र पोखरिया क्षेत्रमा १९४ जनामा हैजा पुष्टि भएको छ। तीमध्ये १८२ जना निको भइ घर फर्किसकेका छन् भने १२ जना अस्पतालमा उपचाररत छन्। हाल भवानी हस्पिटल, प्रभु हस्पिटल, नारायणी अस्पताल, नेशनल मेडिकल कलेज र एडभान्स हस्पिटलमा बिरामी उपचाररत छन्।
पर्सामा झाडापखालाबाट संक्रमित हुनेको कुल संख्या ९६५ पुगेको छ। तीमध्ये ८६५ जना उपचारपछि घर फर्किसकेका छन् भने १०० जना उपचाररत छन्। १६ जना बिरामी गम्भीर अवस्थामा आइसियुमा राखिएका छन्।
स्वास्थ्य कार्यालयले हैजाको लक्षण देखिएमा तत्काल स्वास्थ्य संस्थामा सम्पर्क गर्न र सरसफाइमा विशेष ध्यान दिन सर्वसाधारणलाई आग्रह गरेको छ। बारामा संक्रमण देखिनु थप चुनौतीपूर्ण भएको भन्दै स्वास्थ्य निकायले निगरानी र परीक्षणमा तीव्रता बढाएको जनाएको छ।
