वीरगंज । जिल्ला प्रहरी कार्यालय पर्साले चोरी र लागुऔषध कारोबारमा संलग्न एक युवकलाई गाँजा र ठूला परिमाणको नगदसहित नियन्त्रणमा लिएको छ ।
प्रहरीका अनुसार पक्राउ पर्नेमा वीरगंज महानगरपालिका–१६ बस्ने ३५ वर्षीय शेख साहेबजान मियाँ (मखु) रहेका छन् । उनी विगतमा पनि पटक–पटक चोरीसम्बन्धी कसूरमा सजाय भोगिसकेको पाइएको छ ।
मौलापुर नगरपालिका–१ रौतहटका रामपुकार प्रसाद यादवको घरबाट रु. एक लाख २९ हजार ८ सय भारतीय रुपैयाँ, रु. एक लाख २५ हजार नेपाली रुपैयाँ र सुन–चाँदीका गहना चोरी भएको घटनाको अनुसन्धान क्रममा सीसीटीभी फुटेजको आधारमा मियाँलाई प्रहरीले पक्राउ गरेको थियो ।
विशेष सूचना र अनुसन्धानका क्रममा उनको घर खानतलासी गर्दा ९ किलो ८०९ ग्राम गाँजा, डिजिटल तराजु, विभिन्न सुन–चाँदीका गहना र श्रोत नखुलेको १५ लाख १५ हजार नगद बरामद गरिएको जिल्ला प्रहरी कार्यालय पर्साका प्रवक्ता प्रहरी नायव उपरीक्षक किशोर लम्सालले वताए ।
उनका अनुसार बरामद गहनामा सुनका झुम्का, नाकको नथिया, माङ टिका, सिक्रीसहितको लकेट, टप, चाँदीका पायल र माठा रहेका छन् । पक्राउ परेका मियाँविरुद्ध चोरी र लागुऔषध सम्बन्धी कसूरमा जिल्ला अदालत पर्साबाट म्याद थप गरी थप अनुसन्धान भइरहेको छ ।
