वीरगंज । पर्साकाे छिपहरमाई गाउँपालिका–१ का १२ जना बासिन्दाले प्रहरी चौकी मिर्जापुरमा गैरकानुनी घरेलु मदिरा बिक्री वितरणको सम्बन्धमा उजुरी दिएका छन्।
निवेदकले सो क्षेत्रमा मदिरा खुला रूपमा बिक्री वितरण हुँदै आएको छ, जसले गाउँघरमा झगडा, गालीगलौज, अश्लील शब्द प्रयोग र होहल्ला जस्ता अवाञ्छित गतिविधि बढाएको छ । भारतीय व्यक्तिहरू बिहार राज्यमा मदिरा निषेध भएको कारण यहाँ आएर राति अबेरसम्म मदिरा सेवन गर्दै होहल्ला र झगडा गर्ने घटना पनि बढिरहेको उल्लेख गरेका छन् ।
थरुहटको सोबरनपुर र बस्तीबाट मोटरसाइकलमा दैनिक ६० लिटर हाराहारी घरेलु मदिरा ल्याएर पसल–पसलमा आपूर्ति गर्ने गरेको तथ्य पनि निवेदनमा उल्लेख गरिएको छ ।
बासिन्दाहरूले प्रहरी चौकी मिर्जापुरका प्रहरी सहायक निरीक्षक बिनोद प्रसाद साह मार्फत सम्बन्धित व्यक्तिलाई नियन्त्रणमा लिएर कानून अनुसार कारबाही गर्न आग्रह गरेका छन्।
स्थानिय धर्मेन्द्र प्रसाद यादव, उमेश प्रसाद यादव, धुरेन्द्र प्रसाद यादव, अनिल यादव, भुपेन्द्र साह कानु, राधेश्याम यादव, मनबोध यादव, गुडु यादव, सुमन्त उपाध्याय, धर्मेन्द्र प्रसाद यादव, बृजमोहन उपाध्याय र रबिश पासवानले घरेलु मदिरा नियन्त्रणकाे माग गर्दै लिखित निवेदन दिएका हुन् ।
