वीरगंज । नेपाल प्रहरीले सञ्चालन गर्दै आएको “कार्यदक्षता मुल्यांकन (Police Baton) २०८२” अन्तर्गत शनिबार वीरगंज वडा नम्बर ४ स्थित वडा प्रहरी कार्यालय विर्तामा विशेष निरीक्षण कार्यक्रम सम्पन्न भएको छ।
प्रहरी प्रधान कार्यालयबाट आएको निरीक्षण तथा अनुगमन टोलीले प्रहरी कार्यदक्षता, संगठनात्मक संरचना, सेवाप्रवाह र जनसम्पर्कको अवस्थाबारे प्रत्यक्ष अवलोकन गर्दै मूल्यांकन गरेको हो । टोलीको नेतृत्व प्रहरी प्रधान कार्यालयका प्रमुख अतिरिक्त महानिरीक्षक (ए.आई.जी.) मनोज केशरीले गरेका थिए । उनले कार्यालय परिसर तथा व्यवस्थापन निरीक्षण गर्दै प्रहरी संगठनलाई अझ सक्षम, जनमुखी र अनुशासित बनाउन निरन्तर अभ्यास र तालिम आवश्यक रहेकोमा जोड दिए ।
निरीक्षण कार्यक्रममा जिल्ला प्रहरी कार्यालय पर्साका प्रमुख प्रहरी उपरीक्षक (एसपी) गौतम मिश्रसहित विभिन्न प्रहरी अधिकृतहरूको उपस्थिति रहेको थियो । वडा प्रहरी कार्यालय विर्ताका प्रमुख प्रहरी निरीक्षक निरोज चौलागाईंले कार्यालयमा भइरहेको गतिविधि, प्रहरी सेवाप्रवाह र चुनौतीबारे टोलीलाई जानकारी गराएका थिए ।
ए.आई.जी. केशरीले निरीक्षणपछि भने, “प्रहरी संगठनको मूल आधार कार्यदक्षता र अनुशासन हो । यस किसिमको मुल्यांकन अभ्यासले संगठनलाई अझै परिणाममुखी र प्रभावकारी बनाउन मद्दत गर्नेछ ।”
उक्त निरीक्षणले प्रहरी सेवाको गुणस्तर अभिवृद्धि, आन्तरिक संरचना सुदृढ र प्रहरीलाई थप उत्तरदायी बनाउन महत्वपूर्ण योगदान पुर्याउने विश्वास गरिएको छ । नेपाल प्रहरीले “Police Baton २०८२” कार्यक्रम देशभरका विभिन्न जिल्ला र इकाइमा चरणबद्ध रूपमा सञ्चालन गरिरहेको जनाएको छ ।
