वीरगंज । प्याब्सन पर्साको आयोजनामा एवं ओ.आई. पब्लिकेसनको सहकार्यमा वीरगंजस्थित मकालु होटलमा आयोजित पूर्व–प्राथमिक शिक्षक–शिक्षिकामुखी दुई दिने कार्यशाला तालिम शनिबार सम्पन्न भएको छ।
तालिममा प्याब्सनमा आबद्ध ५३ विद्यालयमध्ये ३१ वटा विद्यालयका १६३ जना शिक्षक–शिक्षिकाले सहभागिता जनाएका थिए। आयोजकले यस तालिमले पूर्व–प्राथमिक तहका शिक्षक–शिक्षिकालाई खेलकुद, सिर्जनात्मकता र नवीन विधि–प्रविधिबाट सिकाइलाई अझ प्रभावकारी बनाउन सहयोग पुर्याउने विश्वास व्यक्त गरेका छन्।
प्याब्सन पर्साका अध्यक्ष सरोज प्रसाद चौधरीकाे अध्यक्षतामा भएकाे समापन समाराेहमा प्याब्सनका केन्द्रीय सदस्य छेडुप लामा, वीरगंज महानगरका अध्यक्ष राहुल श्रीवास्तव, सल्लाहकार इमामुद्दिन अहमद, सह–सचिव राम बाबु प्रसाद, पूर्व वरिष्ठ उपाध्यक्ष श्याम केसी, कोषाध्यक्ष प्रबिन चौधरी, सन्नी पाख्रीनलगायतका व्यक्तित्वहरूको उपस्थिती रहेको थियो। कार्यक्रमको सञ्चालन जिल्ला सचिव अशोक सङ्रौलाले गरेका थिए।
तालिम प्रशिक्षक सुशिला श्रेष्ठ र तालिम संयोजक मनिषा सुनुवार श्रेष्ठले तालिमलाई प्रभावकारी बनाएका थिए।
“Let all the private and boarding schools be united” भन्ने नारासहित प्याब्सन–पर्साले तालिममार्फत बालबालिकाको आधारभूत शिक्षामा गुणस्तरीयता र नवीन प्रयोगलाई अभिवृद्धि गर्ने उद्देश्य राखेको जनाएको छ।
