सर्लाही । सर्लाही प्रहरीले विशेष सूचनाको आधारमा गरिएको कारबाहीमा २५ किलो लागुऔषध (गाँजा) सहित एकजनालाई पक्राउ गरेको छ भने एकजना फरार भएका छन्।
बिहिबार बिहान ११:५५ बजे लालबन्दी नगरपालिका–८ खतिवडा चोक नजिक चेकजाँच गर्ने क्रममा इलाका प्रहरी कार्यालय लालबन्दीका प्रहरी निरीक्षक वीरेन्द्र सिंह जोहारीको कमाण्डमा खटिएको टोलीले बाग्मती प्रदेश–०२–०४२ प ४०५३ नम्बरको मोटरसाइकल रोकेर कारबाही गरेको हो ।
प्रहरीलाई देखेपछि मोटरसाइकलमा सवार दुईजनाले सवारीसाधन र झोला फालेर भाग्ने प्रयास गरेका थिए । पछ्याउँदा सर्लाही, लालबन्दी नगरपालिका–१४ कामिटारका २० वर्षीय सन्ते ब्लोनलाई नियन्त्रणमा लिन सफल भए पनि अर्का व्यक्ति भने फरार छन् ।
उक्त मोटरसाइकलमा रहेका दुईवटा कालो झोलामा रातो प्लास्टिकमा प्याक गरिएको ५/५ किलोका गरी २५ किलो गाँजा फेला परेको प्रहरीले जनाएको छ ।
पक्राउ परेका व्यक्ति र बरामद गाँजा तथा मोटरसाइकल आवश्यक कारबाहीका लागि जिल्ला अदालत सर्लाहीमा पेश गरिएको र पाँच दिनको म्याद थप गरी अनुसन्धान भइरहेको जिल्ला प्रहरी कार्यालय सर्लाहीका प्रवक्ता प्रहरी नायब उपरीक्षक सरोज राईले जानकारी दिए । फरार व्यक्तिको खोजी कार्य भने जारी रहेको प्रवक्ता राईले वताए ।
