वीरगंज । वीरगंजकाे गौरव मानिने ऐतिहासिक नारायणी रङ्गशाला जिर्ण अवस्थामा पुगेपछि यसलाई पुनर्जीवित गर्ने उद्देश्यले “नारायणी रङ्गशाला बचाउ अभियान” सुरु गरिएको छ। राजनीतिक दल र तीन तहका सरकारको वेवास्ताबीच स्थानीय अभियन्ता, आरम्भ भेट्रान क्लब, खेलाडी तथा सामाजिक अभियन्ताहरूको संयुक्त पहलमा श्रमदान हुँदै आएको छ।
वर्षौँदेखि कुनै सुधार वा पुनर्निर्माण नहुँदा एक समय राष्ट्रिय प्रतियोगिता, खेलकुदका कार्यक्रम र सांस्कृतिक गतिविधिका लागि परिचित बनेको यो रङ्गशाला अहिले खराव संरचना र बेवास्ताको शिकार बनेको छ।
सामाजिक अभियन्ता विशाल कुमारको नेतृत्वमा भएको अभियानमा आरम्भ भेट्रान क्लबका सदस्य, खेलाडी र स्थानीय युवाहरू सक्रिय सहभागी बनेका छन् । उनीहरूले रङ्गशालाको वरिपरि सफाइ, घाँस झार्ने र जीर्ण संरचना हटाउने काम गरेका छन् ।
अभियन्ता विशाल कुमारले सरकार र निकायहरूले ध्यान नदिएको अवस्थामा स्थानीयले आफैं अघि बढेर रङ्गशालाको संरक्षणको जिम्मा लिनुपरेको बताए । उनका अनुसार स्थानीयको सक्रियता र सामूहिक प्रयासबाट यो अभियानले ठूलो सन्देश दिएको छ ।
यस अभियानपछि अब नारायणी रङ्गशालालाई बचाउन सकिन्छ भन्ने नयाँ आशा पलाएको छ । स्थानीयले नियमित रूपमा यस्ता गतिविधि सञ्चालन गर्ने र खेल मैदानलाई खेलाडीमैत्री बनाउन निरन्तर दबाब दिने प्रतिबद्धता जनाएका छन् ।
ग्रीन सिटी वीरगंज, आरम्भ भेट्रान क्लब र सामाजिक अभियन्ता विशाल कुमारको नेतृत्वमा गरिएको यस अभियानले शहरको हरितरण र खेलकुद पूर्वाधार जोगाउन स्थानीय स्तरमै ठूला पहल गर्न सकिन्छ भन्ने प्रमाणित गरेको छ ।
