वीरगंज । मध्य नेपाल सन्देश साप्ताहिक पत्रिकाको दशौं वार्षिकोत्सव समारोह बिहीबार भव्य रूपमा सम्पन्न भएको छ । पत्रिकाकी सम्पादक कविता खड्काको अध्यक्षतामा सम्पन्न कार्यक्रम नेपाल पत्रकार महासंघकी केन्द्रीय अध्यक्ष निर्मला शर्माले उद्घाटन गरेकी थिइन ।
समारोहलाई सम्बोधन गर्दै प्रमुख अतिथि समेत रहेकी अध्यक्ष शर्माले हाल पत्रकारिता आर्थिक संकटमा परेको बताइन् । सामाजिक सञ्जालको प्रभावले पत्रकारितामाथि विश्वास घट्दै गएको उल्लेख गर्दै उनले अभिव्यक्ति स्वतन्त्रता कुण्ठित गर्ने गरी बनेका कानुनहरूको विरोधमा महासंघ आन्दोलनरत रहेको वताइन ।
“संविधान विपरीत अभिव्यक्ति स्वतन्त्रता कुण्ठित गर्ने गरी बनेका कानुनहरूको विरोधमा हामी आन्दोलनमै छौं,” अध्यक्ष शर्माले भनिन् । साथै, उनले पत्रकारहरूले केवल सूचना दिने मात्र नभई छिटो, छरितो र व्यवसायिक ढंगले सत्य सूचना दिनुपर्नेमा जोड दिइन् ।
कार्यक्रममा नेपाल पत्रकार महासंघका केन्द्रीय सचिव अशोक तिवारी, लेखा समिति संयोजक केशी लामिछाने, मधेश प्रदेश अध्यक्ष श्याम बन्जारा, पर्सा जिल्ला अध्यक्ष ओमप्रकाश खनाल, पर्साका प्रमुख जिल्ला अधिकारी तोयनारायण सुवेदी, प्रहरी उपरीक्षक गौतम मिश्र, सशस्त्र प्रहरी उपरीक्षक पुरनचन्द्र भट्ट, नेपाल बार एशोसिएसन पर्साका अध्यक्ष रामनारायण कुर्मी, वीरगंज उद्योग वाणिज्य संघका अध्यक्ष हरि गौतम, प्रतिक दैनिकका प्रधान सम्पादक जगदिश शर्मा, प्रेस चौतारी मधेश प्रदेश अध्यक्ष लालबाबु शेख, पर्सा जिल्ला अध्यक्ष निरञ्जन मिश्र, समाजवादी प्रेस संगठन पर्सा अध्यक्ष शम्भु कुमार सुमन, राष्ट्रिय मुक्ति पार्टीका नेता नेजामुदिन सम्मानीलगायतको उपस्थिति रहेको थियो ।
पत्रकार झा, यादव र भण्डारी पुरस्कृत
सो अवसरमा मध्ये नेपला सन्देशले स्थापना गरेकाे अन्नपूर्ण पोस्ट मधेश प्रदेश ब्यूरो प्रमुख मनिका झा, पत्रिकाका स्तम्भकार शिवनाथ यादव र गीता भण्डारीलाई सम्मान गरिएको थियो । झालाई १५ हजार रुपैयाँसहित सम्मानपत्र, यादव र भण्डारीलाई ११ हजार रुपैयाँसहित सम्मानपत्र प्रदान गरिएको थियो ।
वीरगंजस्थित कलाशिक बैंक्वेटमा भएकाे कार्यक्रमकाे संचालन संचारकर्मी लक्ष्मि खरेलले गरेकी थिइन ।
