वीरगंज । पर्साकाे ग्रामिण भेगमा पनि हैजा संक्रमित भेटिन थालेका छन् । पाेखरिया अस्पतालमा मंगलबार ३ जना र बुधबार ५ जनामा हैजा संक्रमण पुष्टि भएकाे मेडिकल सुपरिटेन्डेन्ट डा. आनन्द रौनियारले बताए ।
संक्रमित सबै पर्साका ग्रामीण क्षेत्रका स्थानीय रहेको उनले जानकारी दिए । उनका अनुसार संक्रमितहरुकाे पाेखरिया अस्पताल मै भर्ना गरि उपचार भइरहेकाे छ ।
वीरगंजकाे विभिन्न वडामा भेटिएकाे हैजा संक्रमित पर्साकाे ग्रामिण भेगमा पनि भेटन थालेपछि ग्रामिण भेगमापनि सर्तकता अपनाउन तथा पूर्व तयारी जरुरी रहेकाे चिकित्सकहरुले वताएका छन् ।
वीरगंजमा मंगलबार २१ जनामा संक्रमण पुष्टि भएकोमा बुधबार फेरि थप १५ जनामा हैजा पुष्टि भएको छ । वीरगंजका विभिन्न अस्पतालमा मंगलबार दिउँसो ३ बजेदेखि बुधबार साँझ ६ बजेसम्म थप १५ जनामा संक्रमण भेटिएको वीरगंज महानगरपालिकाका जन स्वास्थ्य निरीक्षक सुमन चन्द्र ठाकुरले जानकारी दिए ।
उनका अनुसार हालसम्म वीरगंजमा १३२ जना संक्रमितमध्ये ५६ जना डिस्चार्ज भइसकेका छन् भने ७६ जना अझै उपचाररत छन् ।
हाल सम्म वीरगंजमा झाडापखालाका बिरामी ५२८ जना अस्पताल पुगेका छन् । तीमध्ये २५७ जना उपचारपछि घर फर्किएका छन् भने हाल २७१ जना अझै विभिन्न अस्पतालमा उपचाररत रहेका छन् ।
