काठमाडौं । रौतहटकी रुबीकुमारी साहको हत्या आरोपमा पक्राउ परेका मुख्य आरोपी लक्ष्मण पासवानकाे कीर्तिपुरस्थित बर्न अस्पतालमा उपचारका क्रममा बुधबार मृत्यु भएकाे छ ।
काठमाडौं प्रहरी परिसरका प्रमुख अपिल बोहराका अनुसार, पासवानको मृत्यु बुधबार अपराह्न ५:५५ बजे भएको हो ।
पासवान रौतहटको माधवनारायण नगरपालिका–६ माधोपुरबाट पश्चिमतर्फको बगैंचा हुँदै बिसुनपुरवा–मानपुर जाने बाटोमा जलेर घाइते भएको अवस्थामा फेला परेका थिए । । उनको अवस्था गम्भीर देखिएपछि तत्काल उपचारका लागि काठमाडौं ल्याइएको थियो ।
गत शनिबार गौर बजार जान भनेर डेराबाट निस्किएकी रुबीको शव सुटकेसमा प्याक गरेको अवस्थामा भेटिएको थियो ।प्रहरीले घटनासँग सम्बन्धित अन्य विषयमा अनुसन्धान जारी रहेको जानकारी दिएको छ ।
पासवानले आत्मदाहकाे प्रयास गर्नु अघि बनाएकाे आफ्नाे भिडियोमा आफु कक्षा ८ देखि रुबीसँग प्रेम सम्बन्धमा रहेको र काेर्टमा आफुहरुले विवाह समेत गरेकाे दाबी गरेका थिए ।
