वीरगंज । रौतहटकी रुबीकुमारी साहको हत्या प्रकरणमा मुख्य आरोपी लक्ष्मण पासवानले बुधबार अपराध स्वीकारेका छन् । आत्मदाहकाे प्रयास गरेका उनलाई प्रहरीले जलेको अवस्थामा गौर नगरपालिका–९ सिरसियाबाट नियन्त्रणमा लिएर प्रारम्भिक उपचारपछि काठमाडौंस्थित कीर्तिपुर बर्न अस्पतालमा थप उपचारका लागि पठाएको छ ।
पासवानले बनाएकाे आफ्नाे भिडियोमा कक्षा ८ देखि रुबीसँग प्रेम सम्बन्ध रहेको, आर्थिक अभाव र रुबीकी आमाको दबाबका कारण सम्बन्ध टुटेको बताएका छन् । उनले आरोप लगाए कि रुबीकी आमा छोरीलाई लोभ-लालच र अन्य व्यक्तिहरूसँगको सम्बन्धमा बाध्य पार्दै सताइरहन्थिन् ।
भिडियोमा पासवानले भनेका छन्, “हामीले भागेर विवाह गरेका थियौं । तर निरन्तर मानसिक दबाब, ब्ल्याकमेल र अन्य व्यक्तिहरूको लोभ-लालचका कारण म बाध्य भएँ । म दोषी हुँ, तर जेलमा बस्न सक्दिनँ। म मर्छु । मेरो प्राण त्यहीँ छ ।”
घटनाको क्रममा पासवानले राजन, सरलु लगायत अन्य व्यक्तिहरूको दबाब र ब्ल्याकमेलका कारण मनोवैज्ञानिक तनावमा रहेकाले आत्मदाह प्रयास गरेको बताएका छन् । उनले घटना अघि प्रेमिकासँग विवाद हुँदा मनोवैज्ञानिक दबाब बढेको र अन्ततः हत्या गरेको स्वीकारेका छन् ।
प्रहरीले घटनास्थल गौर–९ सिर्सिया सडक खण्ड अन्तर्गत मुडवालबा मोड नजिक सडकको पश्चिम किनारामा शव फेला परेको जनाएको छ । अनुसन्धान जारी रहेको र आवश्यक कानुनी प्रक्रिया अघि बढाइएको प्रहरी स्रोतले बताए ।
जिल्ला प्रहरी कार्यालय रौतहटका अनुसार, बुधबार बिहान ७ बजे माधवनारायण नगरपालिका–६ स्थित नहरको छेउ, राजदेवी मन्दिर नजिक चौरमा लक्ष्मण पासवान जलेर घाइते अवस्थामा फेला परेका हुन् ।
पासवानलाई रौतहटको गौर नगरपालिका–९ मुडवलवा गेट नजिक सुटकेसमा फेला परेको रुबी देवी साहको शवको हत्याको मुख्य शंकित व्यक्ति मानिएको छ । प्रहरीले प्राप्त सूचना अनुसार, पासवानले आत्मदाह गर्ने उद्देश्यले आफ्नो शरीरमा मट्टीतेल खन्याएर आगो लगाएका थिए ।
