काठमाडौं । काठमाडौं महानगरपालिकाले गरेको ज्यादतीविरुद्ध कबाड व्यवसायीले मंगलबार दोस्रो दिन पनि आन्दोलन जारी राखेका छन् । भृकुटीमण्डपबाट शुरु भएको प्रदर्शन कमलादीस्थित काठमाडौं महानगरपालिकाको कार्यालयसम्म पुगेर व्यवसायीहरूले घेराउसमेत गरेका छन्।
कबाड व्यवसायी संघर्ष समितिका अध्यक्ष रामकेवल गुप्ताले सर्वोच्च अदालतको आदेश विपरीत महानगर प्रमुख बालेन्द्र शाहले कबाड व्यवसायमाथि तोडफोड र अत्याचार गरिरहेको आरोप लगाउँदै शान्तिपूर्ण आन्दोलनमा उत्रनु परेको बताए। उनले प्रश्न गर्दै भने, “के मेयर बालेन सर्वोच्च अदालतभन्दा माथि छन्? कानूनी शासनको कुरा गर्नेले अदालतको आदेश पालना गर्नुपर्छ कि पर्दैन?”
उनका अनुसार सर्वोच्च अदालतले दिएको आदेशको पालना गर्ने प्रतिबद्धता बालेनले नगरेसम्म शान्तिपूर्ण आन्दोलन जारी रहने छ।
आन्दोलनमा सहभागी व्यवसायीहरूले “सर्वोच्च अदालतको आदेश पालना गर”, “कबाड व्यवसायीमाथिको अत्याचार बन्द गर”, “बालेनको गुण्डागर्दी बन्द गर” जस्ता नारा लगाउँदै विरोध प्रदर्शन गरेका छन्।
कबाड व्यवसायीहरूले पाँच बुँदे माग राख्दै आन्दोलन थालेका छन्। उनीहरूको प्रमुख मागमा पेशा–व्यवसाय गर्न पाउने संवैधानिक हक सुनिश्चित गर्नुपर्ने, महानगरबाट भइरहेको कुटपिट, अपहरण, ज्यादती र संरचना भत्काउने कार्य तत्काल रोक्नुपर्ने, संलग्न महानगर प्रहरीलाई कानुनी कारबाही गर्नुपर्ने, व्यवसायी, संकलक र मजदुरको ज्यान–धनको सुरक्षा सुनिश्चित गर्नुपर्ने तथा विगत दुई वर्षमा महानगरबाट भएको क्षतिको क्षतिपूर्ति दिनुपर्ने छन्।
आन्दोलनकारीहरूले आफ्ना माग पूरा नभएसम्म आन्दोलन निरन्तर जारी रहने चेतावनी दिएका छन्।
