वीरगंज । मधेश प्रदेश सरकारका स्वास्थ्य तथा जनसङ्ख्या मन्त्री सत्रुधन प्रसाद सिंहज्यूको विशेष उपस्थितिमा आइतबार पर्सामा जिल्ला स्वास्थ्य संकट व्यवस्थापन समितिको बैठक बसेको छ ।
जिल्ला स्वास्थ्य संकट व्यवस्थापन समितिको संयोजक एवं निमित्त प्रमुख जिल्ला अधिकारी सुमन कुमार कार्कीको अध्यक्षतामा सम्पन्न बैठकले हाल जिल्लामा फैलिरहेको झाडा पखाला तथा हैजा (कोलेरा) नियन्त्रणका लागि ६ बुँदे निर्णय गरेको छ।
बैठकले सुरक्षा निकाय, स्थानीय तह, राजनीतिक दल, नेपाल रेडक्रस सोसाइटी, मिडिया तथा विभिन्न संघसंस्थाको समन्वयमा घरदैलो अभियान, माईकिङ्ग र सचेतना कार्यक्रम तत्कालै सघन रूपमा सञ्चालन गर्ने निर्णय गरेको छ।
त्यसैगरी स्वास्थ्यकर्मीको अभाव हुन सक्ने सम्भावनालाई ध्यानमा राखी आवश्यकबाहेक बिदा नदिने, औषधि, किट तथा खानेपानी शुद्धिकरणका औषधि पर्याप्त मात्रामा सुनिश्चित गर्ने व्यवस्था मिलाउने, तथा महामारी नियन्त्रणका लागि Joint Operation Centre स्थापना गर्ने निर्णय गरिएको छ।
यस्तै, नेपाल सरकार तथा प्रदेश सरकारबाट प्राप्त जनशक्ति र स्रोत साधनलाई Pool खडा गरी व्यवस्थापन गर्ने र हाल फैलिरहेको महामारीको स्रोत पहिचान गर्न सम्बन्धित स्थानीय तहलाई जिम्मेवारी दिने निर्णय पनि बैठकले गरेको छ।
बैठकमा स्वास्थ्य कार्यालय पर्सालाई आवश्यक औषधि व्यवस्थापनका लागि अग्रसर हुने जिम्मेवारी दिइएको छ भने महामारी नियन्त्रणका लागि प्राविधिक सहयोग प्रदेश तथा संघीय सरकारबाट उपलब्ध गराइने उल्लेख गरिएको छ।
