वीरगंज । संघीय मामिला तथा सामान्य प्रशासन मन्त्रालयद्वारा प्रकाशित आ.व. २०८०/०८१ को स्थानीय तह संस्थागत क्षमता स्वमूल्याङ्कन (LISA) नतिजाअनुसार पर्सा जिल्लामा पटेर्वा सुगौली गाउँपालिका पहिलो भएको छ ।
मन्त्रालयले भदौ ६ गते सार्वजनिक गरेको नतिजाअनुसार पटेर्वा सुगौलीले गुणस्तर परीक्षणपछि ७१.२५ प्रतिशत अंक प्राप्त गर्दै जिल्लाका १४ स्थानीय तहमध्ये पहिलो स्थान हासिल गरेको हो । मन्त्रालयकाे प्रकाशित नतिजा अनुसार पटेर्वा सुगाेली गाउँपालिका जिल्लामा प्रथम हुनुकाे साथै मधेश प्रदेशका गाउँपालिकामध्ये दोस्रो स्थान भएकाे गाउँपालिका अध्यक्ष दिनेश चौधरीले वताए ।
प्रमुख प्रशासकीय अधिकृत प्राण मेहताले जनप्रतिनिधि र कर्मचारीबीचको समन्वय र सहकार्यका कारण गाउँपालिका उत्कृष्ट स्थानमा पुगेको बताए । मेहता गत वर्ष बाराको परवानीपुर गाउँपालिकामा कार्यरत रहँदा त्याे गाउँपालिका पनि प्रथम स्थान हासिल गरेकाे थियाे ।
यस वर्षको नतिजाअनुसार पर्सामा दोस्रो स्थानमा ठोरी गाउँपालिका ६५.५० अंकसहित र तेस्रो स्थानमा वीरगंज महानगरपालिका ६५.२५ अंकसहित रहेका छन् । ठोरी र वीरगंजबीच मात्र ०.२५ अंकको फरक देखिएको छ । पर्सागढी नगरपालिका ५८.५० अंकसहित चौथो र जगरनाथपुर गाउँपालिका ५१.२५ अंकसहित पाँचौँ स्थानमा रहेका छन्।
सबैभन्दा कम अंक बिन्दवासिनी गाउँपालिकाकाे २१ अंक र बहुदरमाई नगरपालिकाकाे २१.७५ अंकसहित रहेकाे छ ।
जिल्लाकाे अन्य पालिका पोखरिया नगरपालिकाकाे ४३.७५ अंक, जिराभवानी गाउँपालिकाकाे ४२.२५ अंक, छिपहरमाई गाउँपालिकाकाे ४२ अंक, धोबिनी गाउँपालिकाकाे ३७ अंक, कालिकामाई गाउँपालिकाकाे ३३.२५ अंक, सखुवा प्रसौनी गाउँपालिकाकाे ३२.७५ अंक र पकहाँ मैनपुर गाउँपालिकाकाे २९.७५ अंक रहेकाे छ ।
यस नतिजा अनुसार पर्साका विभिन्न स्थानीय तहमा प्रशासनिक क्षमता र सेवा प्रवाह सुधारको क्षेत्रमा अझै प्रयास आवश्यक देखिएको छ ।
