वीरगंज । पर्सा जिल्लामा हैजाको संक्रमण बढ्दै गएपछि जिल्ला स्वास्थ्य संकट व्यवस्थापन समितिको बैठक शनिबार सम्पन्न भएको छ। समिति संयोजक एवं कार्यवाहक प्रमुख जिल्ला अधिकारी (नि. सिडिओ) सुमन कुमार कार्कीको अध्यक्षतामा बसेको बैठकले झाडापखाला र हैजा (कोलेरा) रोकथामका लागि तत्काल लागू हुने विभिन्न निर्णयहरू गरेको हो।
बैठकले सबै सरोकारवालाको समन्वयमा व्यापक जनचेतनामूलक घरदैलो कार्यक्रम सुरु गर्ने निर्णय गरेको छ। उपचारका लागि गएका बिरामीलाई पर्सास्थित सबै अस्पतालहरूले पहिलो प्राथमिकतामा राखी यथोचित उपचार उपलब्ध गराउनुपर्ने, साथै संक्रमण बढेमा Dedicated Bed छुट्याई थप जनशक्ति परिचालन गर्ने निर्णय पनि बैठकले गरेको छ।
त्यस्तै, स्वास्थ्य कार्यालय पर्साले उपचारका लागि आवश्यक औषधि तथा परीक्षण किट उपलब्ध गराउने, सरसफाइ प्रवर्द्धनका लागि स्वास्थ्यकर्मी, स्वयंसेविका र सरोकारवाला समूहलाई प्रभावकारी ढंगले परिचालन गर्न वीरगंज महानगरपालिकालाई अनुरोध गर्ने निर्णय भएको छ।
यसका साथै, सुरक्षा निकाय, स्थानीय तह, राजनीतिक दल, पेशागत संघसंस्था, नेपाल रेडक्रस सोसाइटी, गैरसरकारी संस्था, सञ्चारकर्मी र दातृ निकायहरूको सहकार्यमा सचेतना अभियान सञ्चालन गर्ने र आवश्यक सामग्री व्यवस्थापन गर्ने निर्णय पनि बैठकले गरेको छ।
बैठकले अर्को बैठक भोलि मिति २०८२ भदौ ८ गते दिउँसो ३ बजे जिल्ला प्रशासन कार्यालय, पर्सामा राख्ने निर्णयसमेत गरेको छ।
