वीरगंज । पछिल्ला दिनमा हैजाको सङ्क्रमण बढ्दै गएपछि वीरगंज महानगरपालिकाले अत्यावश्यक सतर्कता स्वरूप विद्यालय बन्द गर्ने निर्णय गरेको छ। महानगरको शैक्षिक प्रशासन महाशाखाले जारी गरेको विज्ञप्तिअनुसार भाद्र ८ र ९ गते (आइतबार र सोमबार) दुई दिनका लागि महानगरपालिका अन्तर्गतका सम्पूर्ण सामुदायिक तथा संस्थागत विद्यालयहरूको पठनपाठन स्थगित गरिएको हो।
सूचनामा भनिएको छ, “हैजाको सङ्क्रमणलाई मध्यनजर गर्दै विद्यालयहरूमा पठनपाठन अस्थायी रूपमा रोकिएको छ।” साथै विद्यार्थी, अभिभावक तथा शिक्षकहरूलाई सतर्कता अपनाउन आह्वान गरिएको छ।
महानगरले सुरक्षित स्वास्थ्य अभ्यासमा जोड दिँदै सबैलाई पानी उमालेर मात्र पिउन, शौचालय प्रयोगपछि अनिवार्य रूपमा साबुनपानीले हात धुन, काँचै खाने तरकारी तथा सागपात तातोपानीले धोएर मात्र खाने, सरसफाइ कायम राख्ने र अन्य सावधानी अपनाउन अनुरोध गरेको छ।
महानगरले हैजाको जोखिम कम गर्न सामूहिक सहयोग आवश्यक भएको भन्दै सचेत रहन सबैलाई आग्रह गरेको छ।
