वीरगंज । वीरगंज महानगरपालिका वडा नं. २४ कार्यालयको आयोजनामा शुक्रबार हिन्दु महिलाहरूको महान पर्व तीज विशेष तथा दर खाने कार्यक्रम भव्य रूपमा सम्पन्न भएको छ।
वीरगंजस्थित साह दरबार होटलमा आयोजित कार्यक्रममा वडा अन्तर्गतका सयौं महिलाहरूको उत्साहपूर्ण सहभागिता रहेको थियो। कार्यक्रममा महिलाहरूले दर खानासँगै नाचगान गरी तीजको उल्लास साझा गरे ।
वीरगंज २४ का वडाध्यक्ष विजय कुर्मीको अध्यक्षतामा भएकाे कार्यक्रममा वडा नं. २० का वडाध्यक्ष रामकिशोर सिंह (पराग), वडा नं. १२ का वडाध्यक्ष सुरेश गुप्ता, वडा नं. २३ का वडाध्यक्ष अवधकिशोर कुशवाहा, सारधा मावि बशुहरीका प्रधानाध्यापक अनिल बर्णवाल, वडा नं. २४ का वडा सदस्य सदाम हुसेन, सीता देवीलगायत जनप्रतिनिधिहरूको विशेष उपस्थिति रहेको थियो।
कार्यक्रमको सञ्चालन राहुल साहले गरेका थिए । आयोजकहरूले यस किसिमका कार्यक्रमले महिला बीच एकता, सांस्कृतिक परम्परा र सामाजिक सद्भाव मजबुत हुने विश्वास व्यक्त गरेका छन् ।
यसैगरी, सगरमाथा एकेडेमी, वीरगंजले हरितालिका तीजको अवसरमा महिलाहरूबीच आपसी भेटघाट, आत्मीयता र सांस्कृतिक मूल्यको सम्मान गर्दै शुक्रबार दर खाने कार्यक्रमको आयोजना गरेको छ।
स्कूलका अध्यक्ष जियालाल गुप्ताको सभापतित्वमा सम्पन्न कार्यक्रममा शिक्षक, शिक्षिका, कर्मचारी तथा सरोकारवालाहरूको उत्साहजनक सहभागिता रहेको थियो । कार्यक्रममा नेपाली कला, संस्कृति र परम्पराको संरक्षण तथा प्रवर्द्धनसँगै महिला कर्मचारीहरूबीच समझदारी, एकता र समावेशी भावना अभिवृद्धि गर्ने उद्देश्य रहेको जनाइएको छ।
